အလင်း၊ မတ်လ ၂၄ ရက်၊ တီးတိန်
ချင်းပြည်နယ် တီးတိန်မြို့နယ် ဂဲလ်ဇန်းရွာအနီးမှာ အခြေစိုက်ထားတဲ့ ပြည်သူ့ကာကွယ်ရေးတပ်မတော်- PDA ရဲ့စခန်းကို ဇိုမီး တော်လှန်ရေး တပ်မတော်- ZRA က တိုက်ခိုက်ခဲ့ပြီး လက်နက်ခဲယမ်းတွေ သိမ်းဆည်းရမိခဲ့တယ်လို့ ZRA က မနေ့ မတ်လ ၂၃ ရက်မှာ သတင်းထုတ်ပြန်ထားပါတယ်။
တီးတိန်မြို့နယ် ဂဲလ်ဇန်းရွာအနီး PDA စခန်းကို ZRA က မတ်လ ၂၂ ရက်မှာ အင်အား အလုံးအရင်းနဲ့ အလစ်အငိုက် ဝင်ရောက်စီးနင်းတိုက်ခိုက်ခဲ့ပြီး အင်အားမမျှတဲ့ PDA တပ်ဖွဲ့ဝင်တွေဟာ စခန်းကို စွန့်ခွာပြီး ဆုတ်ခွာပေးခဲ့ရတယ်လို့ သိရပါတယ်။
“တနင်္ဂနွေနေ့မနက်မှာ ZRA က အင်အားအလုံးရင်းနဲ့ ဝင်တိုက်တာပါ။ တိုက်ပွဲတွေ ဖြစ်သေးတယ်။ အဲစခန်းမှာ PDA ဘက်က အင်အားနည်းလို့ ခဏလေးနဲ့ စခန်းသိမ်းနိုင်သွားတယ်” လို့ တီးတိန်မြို့နယ်မှ ဒေသခံတစ်ဦးက ရွှေဖီမြေသို့ ပြောပါတယ်။
စခန်းစီးနင်းမှုအတွင်း ZRA က လက်နက်မျိုးစုံ၊ ခဲယမ်းမီးကျောက်၊ ဆက်သွယ်ရေး စကားပြောစက်အပြင် စစ်ရေးမှာ အရေးပါတဲ့ ကင်းထောက်နဲ့ တိုက်ခိုက်ရေးသုံး ဒရုန်းကိုပါ သိမ်းဆည်းခဲ့တယ်လို့ ထုတ်ပြန်ထားပါတယ်။
ဒါ့အပြင် စခန်းအနီးရှိ ဂဲလ်ဇန်းရွာက အပြစ်မဲ့ဒေသခံ အမျိုးသမီးနှစ်ဦးနဲ့ အမျိုးသားတစ်ဦးကိုလည်း ZRA က ဖမ်းဆီးခေါ်ဆောင်သွားခဲ့တယ်လို့ သိရပါတယ်။
“ရွာက အမျိုးသားတစ်ယောက်၊ အမျိုးသမီးနှစ်ယောက်လည်း ဖမ်းခေါ်သွားပါတယ်။ ပြန်မလွတ်ပေးသေးဘူး။ မိသားစုဝင်တွေက စိုးရိမ်နေကြပါတယ်” လို့ အထက်ပါ တီးတိန်မြို့နယ်မှ ဒေသခံတစ်ဦးက ဆက်ပြောပါတယ်။
ဖြစ်စဉ်နဲ့ပတ်သက်ပြီး PDA ဘက်က ဒီနေ့အထိ တစ်စုံတစ်ရာ ထုတ်ပြန်တာ မရှိသေးပေမဲ့ CDF-Tonzang အဖွဲ့က မတ် ၂၂ ရက်မှာ ပြင်းထန်တဲ့ သဘောထားတစ်ရပ် ထုတ်ပြန်ခဲ့ပါတယ်။
ထုတ်ပြန်ချက်မှာ ZRA အနေနဲ့ သိမ်းဆည်းသွားတဲ့ လက်နက်ပစ္စည်းတွေကို ခြွင်းချက်မရှိ ပြန်လည်ပေးအပ်ဖို့နဲ့ နယ်မြေကျူးကျော်ကာ မျိုးနွယ်စုချင်း အနိုင်ကျင့် စော်ကားနေတဲ့လုပ်ရပ်ကို ချက်ချင်းရပ်တန့်ဖို့ တောင်းဆိုထားပါတယ်။
ဒါ့အပြင် ZRA-EC အနေနဲ့ စစ်တပ်နဲ့ဆက်လက် ပူးပေါင်းကာ တော်လှန်ရေးအဖွဲ့တွေကို နှောင့်ယှက်နေရင် ချင်းလဲန်းကောင်စီဝင် တပ်ဖွဲ့တွေနဲ့ ပူးပေါင်းပြီး ပြန်လည်တိုက်ခိုက်သွားမယ်လို့လည်း ပြတ်သားစွာ သတိပေးထားပါတယ်။
PDA ဟာ တီးတိန်မြို့နယ်အခြေစိုက် ဒေသခံချင်းတော်လှန်ရေးအဖွဲ့ဖြစ်သလို ချင်းလဲန်ကောင်စီ- CC အဖွဲ့ဝင်လည်း ဖြစ်ပါတယ်။
ZRA ရဲ့ လှုပ်ရှားမှုတွေနဲ့ ပတ်သက်ပြီး တီးတိန်မြို့နယ်အခြေစိုက် ချင်းညီနောင်- CB အဖွဲ့ဝင် PDF-Zoland အဖွဲ့ကလည်း ZRA ဟာ စစ်ကောင်စီနဲ့ ပေါ်ပေါ်တင်တင် ပူးပေါင်းသွားပြီလို့ မတ်လ ၁၅ ရက်က ထုတ်ပြန်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
