သုတ၊ မတ်လ ၂၄ ရက်၊ ၁ဝ၅ မိုင်
ကိုးကန့်တပ်မတော်- MNDAA ဖမ်းဆီးထားတဲ့ တအာင်းတပ်မတော်- TNLA ရဲ့ တပ်ဖွဲ့ဝင်တွေကို ပြန်လွှတ်ပေးလိုက်ပြီလို့ စစ်ရေးသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“မနေ့က သိန္နီကနေ အယောက် ၅၀ လွှတ်ပေးတယ်။ တခြားနေရာတွေမှာ ဖမ်းထားတဲ့သူတွေလည်း လွှတ်လာပြီ။ သိမ်းဆည်းထားတဲ့ လက်နက်ခဲယမ်းတွေကိုလည်း ပြန်အပ်တာ ရှိတယ်”
ကွတ်ခိုင်တိုက်ပွဲအတွင်း နမ့်ဖတ်ကာ၊ ၁၀၅ မိုင်၊ သိန္နီ၊ လားရှိုးမြို့နယ် မိုင်းယော်တိုက်နယ်ထဲက တအာင်းတပ်ဖွဲ့ဝင် ၁၀၀ ကျော် ဖမ်းဆီးခံထားရတယ်လို့ တအာင်းတပ်ရဲ့ ပြောရေးဆိုခွင့်ရှိသူ လွေးယေဦးက ရွှေဖီမြေကို ပြောဆိုထားပါတယ်။
ပြီးခဲ့တဲ့ မတ်လ ၁၄ ရက်ကစပြီး ကွတ်ခိုင်မြို့အပါအဝင် လားရှိုး-မူဆယ် ပြည်ထောင်စုလမ်းမကြီးရှိ နမ့်ဖတ်ကာ၊ မူဆယ် ၁၀၅ မိုင်က TNLA ရဲ့ တပ်စခန်းတွေကို MNDAA တိုက်ခိုက်ဖယ်ရှားခဲ့ပါတယ်။
MNDAA နဲ့ TNLA အကြား ဖြစ်ပွားနေတဲ့ တိုက်ပွဲတွေကို တွေ့ဆုံဖြေရှင်းနိုင်ဖို့ နှစ်ဖက်ခေါင်းဆောင်တွေ လောက်ကိုင်မြို့မှာ တွေ့ဆုံခဲ့ပြီး မတ်လ ၂၁ ရက်ကစလို့ နှစ်ဖက်တပ် အပစ်ရပ်ရေးအပါအဝင် နယ်မြေကိစ္စနဲ့ ဖမ်းဆီးခံထားရတဲ့ တပ်ဖွဲ့ဝင်တွေ ပြန်လည် လွှဲပြောင်းရေးကို သဘောတူခဲ့ကြပါတယ်။
လက်ရှိမှာ ကွတ်ခိုင်မြို့ကို MNDAA အုပ်ချုပ်သွားမှာဖြစ်ပြီး မူဆယ် ၁၀၅ မိုင်မှာတော့ PSLF/TNLA ရဲ့ အလံတွေကို ဒီနေ့ မတ်လ ၂၄ ရက်မှာ ပြန်လည်လွှင့်ထူထားတယ်လို့ ဒေသခံတွေက ပြောပါတယ်။
ဒါ့အပြင် တအာင်းတပ် ထိန်းချုပ်ထားတဲ့ နမ့်ခမ်းမြို့ကို တိုက်ခိုက်ဖို့ နမ့်ဖတ်ကာနဲ့ နမ့်ခမ်းကြားရှိ ၁၂ မိုင်ရွာဘက်ကနေ ကိုးကန့်တပ်ဖွဲ့ဝင်တချို့ ပြန်လည် ဆုတ်ခွာသွားပြီဖြစ်ကြောင်း သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
