ရွှေဖီမြေ၊ ဧပြီ ၈ ရက်၊ ပန်ခမ်း
‘ဝ’ပြည်သွေးစည်းညီညွတ်ရေး တပ်မတော်- UWSA ထိန်းချုပ်ထားတဲ့ ပန်ဆန်းခေါ် ပန်ခမ်းမြို့အနီးမှာ ယမ်းချက်စက်ရုံတစ်ခု ပေါက်ကွဲလို့ လူရာနဲ့ချီ ထိခိုက်သေဆုံးခဲ့ပြီး ယမ်းချက်စက်ရုံ ဦးဆောင်လုပ်ကိုင်တဲ့ တရုတ်နိုင်ငံသားကို ဖမ်းမိထားတယ်လို့ စုံစမ်းသိရှိရပါတယ်။
ဖြစ်စဉ်ဟာ မနေ့ ဧပြီ ၇ ရက် နေ့လယ် ၃ နာရီမှာ ပန်ဆန်းမြို့အနီး ယောင်းပန်းရွာမှာ ယမ်းချက်စက်ရုံကနေ ကြီးမားတဲ့ ပေါက်ကွဲမှု ဖြစ်ပွားခဲ့တာပဲ ဖြစ်ပါတယ်။
“အဲပေါက်ကွဲမှုကြောင့် အနည်းဆုံး လူ ၁၆၀ ထိခိုက်သေဆုံးတယ်။ ခန္ဓာကိုယ်အပိုင်းအစတွေအထိ ဖြစ်သွားတာ။ စာရင်းအတိအကျ မသိရဘူး။ အဲထက် များနိုင်တယ်” လို့ သတင်းရင်းမြစ်တစ်ဦးက ပြောပါတယ်။
ပေါက်ကွဲမှု ဖြစ်ပွားတဲ့နေရာအနီးတစ်ဝိုက်မှာ ဆီဆိုင်လည်း ရှိထားတာကြောင့် ထိခိုက်မှု ပိုများစေခဲ့တာ ဖြစ်တယ်လို့ ဆိုပါတယ်။
အဲဒီယမ်းချက်စက်ရုံကို တရုတ်နိုင်ငံသားတွေက ဦးဆောင်လုပ်နေတာဖြစ်ပြီး ဦးဆောင်လုပ်ကိုင်သူတချို့ကို ‘ဝ’တပ်ဘက်က ဖမ်းဆီးထားတယ်လို့ ဆိုပါတယ်။
အဲဒီယမ်းတွေဟာ လက်နက်ထုတ်လုပ်ရာမှာ အသုံးပြုဖို့မဟုတ်ဘဲ သတ္ထုမိုင်း ခွဲရာမှာ အသုံးပြုဖို့ ထုတ်လုပ်နေတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
