ပျားကြီး၊ မတ် ၂၆၊ မန္တလေး
မန္တလေးမြို့၊ မဟာအောင်မြေမြို့နယ်မှာ စက်သုံးဆီသိုလှောင်ရာက မီးလောင်ကျွမ်းမှုဖြစ်ပွားခဲ့ပြီး လူတစ်ဦးသေဆုံးပြီး တစ်ဦးမီးလောင်ဒဏ်ရာတွေ ရရှိခဲ့တယ်လို့ ဒေသခံတွေက ရွှေဖီမြေကို ပြောပါတယ်။
ဒီနေ့ မတ်လ ၂၆ရက်နေ့ မနက် ၁၀ နာရီ ဝန်းကျင်က မဟာအောင်မြေမြို့နယ်၊ ရှမ်းဝိုင်းရပ်ကွက်၊ ၈၆ လမ်းနဲ့ ၈၇ လမ်းကြား ၊ ၃၇ လမ်းမှာရှိတဲ့ စက်သုံးဆီသိုလှောင်ထားတဲ့ ၃ ထပ်နေအိမ်တစ်လုံး မီးလောင်မှုဖြစ်ပွားခဲ့ပြီး ဆယ်ကျော်သက်အရွယ် လူငယ်တစ်ဦးသေဆုံးခဲ့တာဖြစ်ပါတယ်။
“သူတို့က ဆီပန့်ဆိုင်လုပ်တာ။ အဲဒီအတွက် ဆီလှောင်ရာကနေ မီးလောင်တာပဲ။ သားကတော့ သေသွားတယ်။ အမေလုပ်တဲ့သူလည်း မီးလောင်ဒဏ်ရာတွေရသွားတယ်”လို့ မျက်မြင်တွေ့သူဒေသခံအမျိုးသမီးတစ်ဦးကပြောပါတယ်။
မန္တလေးမြို့မှာ ပြီးခဲ့တဲ့ရက်ပိုင်းအတွင်းကစပြီး စက်သုံးဆီရှားပါးပြတ်လပ်မှုတွေရှိလာပြီး ညအိပ်တန်းစီဝယ်ယူရမှုတွေ ရှိလာတာကြောင့် ဒေသခံတချို့ဟာ ဆီသိုလှောင်ပြီး တရားမဝင်ရောင်းချမှုတွေ လုပ်ကိုင်လာကြတဲ့အတွက် အခုလိုမီးလောင်မှုတွေရှိလာတာဖြစ်တယ်လို့ ဒေသခံတွေကဆိုပါတယ်။
မန္တလေးမြို့မှာ ဆီးရှားပါးမှုကိုအခွင့်ကောင်းယူပြီး အဆမတန်အမြတ်တင်ရောင်းချမှုတွေရှိလာတဲ့ တရားမဝင်လမ်းဘေးဆီဆိုင်ပေါင်း ၁၀၀ ကျော်အထိရှိလာပေမဲ့ ဖမ်းဆီးအရေးယူခံရမှုတွေမရှိသေးဘူးလို့ မြို့ခံ ကျန်းမာရေးဝန်ထမ်းတစ်ဦးက ဆိုပါတယ်။
လက်ရှိအချိန်မှာ တရားဝင်သတ်မှတ်ထားတဲ့ စက်သုံးဆီဈေးနှုန်းတွေက တစ်လီတာကို ငွေကျပ် ၄၀၀၀ အောက်မှာပဲရှိနေပေမဲ့ လမ်းဘေးဆီဆိုင်တွေမှာတော့ ၁၀၀၀၀ ကနေ ၁၅၀၀၀ ကျပ်အထိအဆမတန်အမြတ်တင်ရောင်းချနေတာတွေ့ရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
