လွေးဇွန်မိုး၊ မတ်လ ၂၆ ရက်၊ ကွတ်ခိုင်
ရှမ်းမြောက် ကွတ်ခိုင်မြို့က တအာင်းအမျိုးသမီးရေးရာ ရုံးဝန်းထဲမှာ လက်ကျန် ဒရုန်းဗုံး ပေါက်ကွဲမှုဖြစ်လို့ ကလေး ၂ ဦးနဲ့ အမျိုးသမီး ၁ ဦး ထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။
မနေ့ မတ်လ ၂၅ ရက် နေ့လယ် ၁၂ နာရီခွဲမှာ တအာင်းအမျိုးသမီးရေးရာ ရုံးဝန်းထဲမှာ ထင်းသွားသယ်ရင်း မပေါက်ကွဲသေးတဲ့ ဒရုန်းဗုံး ယူကိုင်မိရာကနေ ပေါက်ကွဲမှုဖြစ်ပွားခဲ့တာဖြစ်ပြီး အသက် ၁၀ နှစ်အရွယ် မဆုကလျာ၊ အသက် ၁၃ နှစ်အရွယ် မောင်နိုင်မင်းထွန်းနဲ့ အသက် ၆၃ နှစ်အရွယ် ဒေါ်အေးရွှေတို့ ထိမှန်ဒဏ်ရာရခဲ့တာဖြစ်တယ်လို့ ဒေသခံ အမျိုးသမီးတစ်ဦးက ပြောပါတယ်။
“ကလေးတွေ ထင်သွားသယ်တာ။ ထင်းသွားသယ်ရင်းနဲ့ ဖြစ်ချင်တော့ ဟိုတစ်ခေါက်က အဲဒီရုံးထဲမှာ (ဗုံး) ၂ လုံး ကျတယ်လေ။ အဲ ၂ လုံးကျတဲ့ဟာကို သူ့ရဲ့ ထိပ်ခေါင်းကျန်ခဲ့တာ။ ပေါက်ပြီးသား ထိပ်ကျန်နေတဲ့ဟာကို အဲဒီ ဒေါ်အေးရွှေက သွားကိုင်ကြည့်သေးတယ်တဲ့။ ဖြစ်ချင်တော့ အဲကလေးလည်း ကိုင်ကြည့်တာ။ ကိုင်ကြည့်ပြီးမှ သူက လာလာ ပြန်မယ်ဆိုတဲ့အချိန်မှာ အဲကလေးက လွှင့်ပစ်လိုက်တာ။ လွှင့်ပစ်လိုက်တဲ့အချိန်မှာ ပေါက်သွားတာ”
လက်ရှိမှာ ဒဏ်ရာအပြင်းအထန်ရခဲ့တဲ့ မောင်နိုင်မင်းထွန်းကို သိန္နီပြည်သူ့ဆေးရုံမှာ ကုသဖို့ ပို့ဆောင်ထားပြီး ဒဏ်ရာသိပ်မပြင်းထန်တဲ့ မဆုကလျာနဲ့ ဒေါ်အေးရွှေတို့ကတော့ ရက်ချိန်းနဲ့ ပြန်လာပြရမယ်လို့ သိရပါတယ်။
အလားတူ ကွတ်ခိုင်မြို့နယ် ကောင်းခါး မန်ပိန်းကျေးရွာက ဒေသခံတွေရဲ့ နေအိမ်ခြံဝန်းထဲမှာ မပေါက်ကွဲပဲ ကျန်ရှိနေသေးတဲ့ ဒရုန်းဗုံး ၈ လုံး ကျန်ရှိနေသေးပြီး အဲဒီဗုံးတွေကို လာရောက်ရှင်းလင်းပေးဖို့ MNDAA တပ်ထံကို ဒေသခံတွေက တောင်းဆိုထားကြောင်း သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
