ရွှေဖီမြေ၊ ဧပြီ ၂၉ ရက်၊ ဟိုပန်
ရှမ်းမြောက် ဟိုပန်မြို့နဲ့ ကွမ်လုံမြို့ကြားရှိ ဟိုပန်တံတားမှာ ကိုးကန့်အစောင့်တပ်သားတွေက ကားသမားတွေထံ ငွေတောင်းယူတာ ရှိနေတယ်လို့ ပေးဆောင်ခဲ့ရတဲ့ ကားသမားနဲ့ နီးစပ်သူတစ်ဦးက ရွှေဖီမြေကို ပြောပါတယ်။
ကိုးကန့်တပ်က သတ်မှတ်ထားတဲ့ ယာဉ်လိုင်စင်ကို ဆောင်ထားပြီဖြစ်ပေမဲ့ ဟိုပန်တံတားက ကိုးကန့်အစောင့်တပ်သားတွေဟာ ကားသမားတွေထံ တရုတ်ငွေ ယွမ် ၃၀၀ (၁၈၀၀၀၀)ကနေ ယွမ် ၅၀၀ ( ၃၀၀၀၀၀)အထိ တောင်းယူနေတာတွေ ရှိတယ်လို့ ဆိုပါတယ်။
ကားသမားတစ်ဦးက “အဲဂိတ်မှာ တာဝန်ကျနေတဲ့ ၃ ယောက်က ကောက်တာပါ။ အခွန်ခ အနေနဲ့ ပေးရတာတဲ့။ တစ်ခါဖြတ်ရင် တစ်ခါပေးရတာဆိုတော့ အဆင်မပြေဘူးလေနော်။ ပိုက်ဆံပေးတဲ့အခါမှာလည်း သူတို့ ၃ ယောက်က ပေါ်တင်ယူတာတော့ မလုပ်ဘူး။ ဆေးလိပ်ဗူးထဲ ထည့်ပေးရတာတွေ ကိုယ်က လုပ်ရတယ်။ လိုင်စင်လည်းပါပေမဲ့ ပိုက်ဆံက ပေးရတာပဲ”လို့ ပြောပါတယ်။
အဲဒီအစောင့်တပ်သားတွေ အိမ်စီးကားကိုသာ အဓိကပစ်မှတ်ထား ငွေကောက်ခံနေတာဖြစ်ပြီး တချို့ကားသမားတွေတော့ တရုတ်ငွေ ယွမ် ၇၀၀ (၄၂၀၀၀၀) အထိ ပေးဆောင်နေရတာ ရှိတယ်လို့ နောက်ထပ်ကားသမားတစ်ဦးက ပြောပါတယ်။
“သူတို့ဂိတ်ရောက်တော့ ဗမာလူမျိုးဖြစ်ရင် စပြီးတော့ ရစ်တာပေါ့။ လိုင်စင်တောင်းလည်း ပေးတော့ ဖြတ်မရဘူးတဲ့။ ကျနော်တို့က ကိုးကန့်အခွန်ဆောင်ရအောင်လည်း ဟိုပန်ကနေ ထွက်လာရင် သူတို့နယ်မြေမဟုတ်တဲ့ တခြားမြို့တွေပဲ သွားလာတဲ့သူတွေပါ။ တခါတလေဆို ဘာမှမရှင်းပြပဲနဲ့ ပြန်လှည့်ခိုင်းတာမျိုးတွေလည်း ကြုံနေရတာ”
ဂိတ်စောင့်တပ်သားတွေ အခုလို ကားသမားတွေထံ ငွေကောက်ခံပြီး လုပ်စားနေတာကို သိရှိနိုင်ဖို့ အထက်လူကြီးတွေအနေနဲ့ မြေပြင်ကွင်းဆင်းပြီး အခွန်ကောက်ခံတာတွေကို တားဆီးပေးဖို့ ကားသမားတွေ တောင်းဆိုထားကြပါတယ်။
ဟိုပန်တံတားဟာ “ဝ”တပ် UWSA ထိန်းချုပ်ထားတဲ့ ဟိုပန်မြို့နဲ့ ကိုးကန့်တပ်-MNDAA ထိန်းချုပ်ထားတဲ့ ကွမ်လုံမြို့ကြားမှာ တည်ရှိတဲ့ တံတားဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
