တန့်ယန်းမှာ ကိုရင်ငယ်တစ်ပါး ရေနစ်သေဆုံး

ပို့လဘား၊ ဇူလိုင် ၇ ရက်၊ တန့်ယန်း

ရှမ်းမြောက် တန့်ယန်းမြို့နယ်မှာ ကိုရင်တစ်ပါး ရေဆင်းချိုးရာက‌နေ ရေနစ်သေဆုံးသွားခဲ့တယ်လို့ တန့်ယန်းမြို့နယ် အရန်မီးသတ်တပ်ဖွဲ့ဝင်တစ်ဦးက ရွှေဖီမြေကို ပြောပါတယ်။

မနေ့ ဇူလိုင်လ ၆ ရက် နေ့လယ် ၃ နာရီဝန်းကျင်မှာ တန့်ယန်းမြို့ ရပ်ကွက် ၆ နဲ့ ရပ်ကွက်၂ ကြားမှာရှိတဲ့ ဖိုင်ချမ်းဆည်မှာ ကိုရင်တစ်ပါးက ရေဆင်းချိုးရာကနေ ရေနစ် သေဆုံးခဲ့တာ ဖြစ်ပါတယ်။

“အဲချောင်းမှာ ကိုရင် ၅ ပါးသွားတာ။ ၄ပါးက ရေကြီးလို့ဆိုပြီး မချိုးရဲဘူး။ အဲတစ်ပါးကတော့ တစ်ခါတည်းခုန်ချပြီး ရေထဲနစ်ပါသွားတာပေါ့။ လိုက်ဆွဲလည်း မရတော့ဘူး။ ကျနော်တို့ဆီ ညနေ ၅ နာရီခွဲ‌လောက်မှ အကြောင်းကြားလာတယ်။ ညသွားရှာတယ် မတွေ့ခဲ့ဘူး။ ဒီမနက်လည်း သွားရှာသေးတယ် သူ့အလောင်းမတွေ့ခဲ့ဘူး။ ဒီညနေပိုင်းမှာ သူ့အလောင်းပြန်တွေ့တာ”

ရေနစ်သေဆုံးသွားတဲ့ ကိုရင်လေးဟာ အသက် ၁၁ နှစ်အရွယ်ဖြစ်ပြီး တန့်ယန်းမြို့ ဝေဠုဝန်ကျောင်းတိုက်မှာနေတာဖြစ်တယ်လို့ ဆိုပါတယ်။

သေဆုံးသွားတဲ့ ကိုရင်ရဲ့ရုပ်အလောင်းကိုတော့ တန့်ယန်းမြို့ သန္ဓေမီးသတ်တပ်ဖွဲ့ဝင်၊ အရန်မီးသတ်တပ်ဖွဲ့ဝင်နဲ့ တန့်ယန်းလူငယ်အဖွဲ့တို့ ပူးပေါင်းပြီး ပြည်သူ့ဆေးရုံသို့ ပို့ဆောင်ပေးခဲ့တာ ဖြစ်ပါတယ်။

~ ~ ~

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram