ရွှေဖီမြေ၊ ဩဂုတ် ၂၅ ရက်၊ ပလက်ဝ
အာရက္ခတပ်တော်- AA ထိန်းချုပ်ထားတဲ့ ချင်းပြည်နယ် ပလက်ဝမြို့နယ်ထဲက ဗုံးကြဲတိုက်ခိုက်ခံရမှုမှာ ဒေသခံ ၅ ဦး သေဆုံးပြီး ၁၇ ဦး ဒဏ်ရာ ရရှိခဲ့တယ်လို့ AA က ထုတ်ပြန်လာပါတယ်။
မနေ့ ဩဂုတ် ၂၄ ရက် နေ့လယ် ၁၂ နာရီဝန်းကျင်မှာ ပလက်ဝမြို့နယ် စိမ့်ညှင်းဝရွာကို စစ်တပ်က ဂျက်ဖိုက်တာနဲ့ လေကြောင်းကနေ ဗုံးကြဲတိုက်ခိုက်ခဲ့တာလို့ ဆိုပါတယ်။
ဗုံးကြဲတိုက်ခိုက်မှုကြောင့် စိမ်းညှင်းဝရွာရှိ ဘုန်းကြီးကျောင်းနဲ့ ကျေးရွာအတွင်းကို ဗုံးသီး ကျရောက်ပေါက်ကွဲခဲ့ရာ ဘုန်းကြီးကျောင်းမှာ ပညာသင်ကြားနေကြတဲ့ မူလတန်းကျောင်းသား ၁ ဦးနဲ့ အသက် ၁ နှစ်အရွယ် ကလေးငယ်တစ်ဦးအပါအဝင် ဒေသခံ ၅ ဦး သေဆုံးခဲ့တာပဲ ဖြစ်ပါတယ်။
ဒါ့အပြင် အသက် ၁၀ နှစ်အောက် မူလတန်းကလေးငယ် ၈ ဦးအပါအဝင် ဒေသခံ ၁၇ ဦးလည်း ထိခိုက်ဒဏ်ရာ ရရှိခဲ့ကြပါတယ်။
AA ထိန်းချုပ်ဒေသကို စစ်တပ်က မကြာခဏ လေကြောင်းကနေ ဗုံးကြဲတိုက်ခိုက်လို့ ဒေသခံ ထိခိုက်သေဆုံးမှုလည်း ဆက်တိုက် ရှိနေပါတယ်။
ဒေသခံတွေအနေနဲ့ စစ်တပ်ရဲ့ လေကြောင်းနဲ့ရေကြောင်းရန်ကို အထူးသတိထား နေထိုင်ကြဖို့ AA က အသိပေးထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
