ဆုမွန်၊ မေလ ၂၃ ရက်၊ လားရှိုး
စစ်ကောင်စီတပ် ထိန်းချုပ်ထားတဲ့ ရှမ်းမြောက် လားရှိုးမြို့ပေါ်မှာ ကားဝယ်မယ်ဆိုပြီး ကားမောင်းပြေးသွားတာ ဆက်ရှိနေသလို ခိုးယူခံရမှုတွေလည်း ဆက်လက် ဖြစ်ပွားနေတယ်လို့ ဒေသခံတွေက ရွှေဖီမြေကို ပြောပါတယ်။
မေလ ၂၁ ရက် ညနေ ၆ နာရီခန့်မှာ လားရှိုးမြို့ ရပ်ကွက်(၈) မန်ဆူအရှေ့ စိန်လဲ့ညိုတည်းခိုမှာ တည်းခိုနေတဲ့ အမျိုးသားတစ်ဦးက ကားဝယ်မယ်ဆိုပြီး ကားခိုးယူကာ ထွက်ပြေးသွားတယ်လို့ ဆိုပါတယ်။
ကိုယ်တိုင်ကြုံခဲ့ရသူနဲ့ နီးစပ်သူတစ်ဦးက “သူကားဝယ်မယ်လို့ ကျနော်တို့ကို ပြောတယ်။ သူစမ်းမောင်းကြည့်မယ်ဆိုပြီး ကျနော်တို့လည်း ကျနော်တို့ လူတစ်ယောက် သူနဲ့ ထည့်ပေးလိုက်တယ်။ လမ်းတစ်ဝက်ရောက်တော့ ကားက ဘတ္ထရီ ထောက်ရတယ်လေ။ အဲဒီကား ဘတ္ထရီ ဆင်းထောက်တဲ့အချိန်မှာပဲ သူက မောင်းပြေးသွားတာ။ သူနမ္မတူ မြို့ရှောင်လမ်းဘက်ကို မောင်းစမ်းတာ။ အဲဘက်ကို မောင်းပြေးသွားတာ” လို့ ဆိုပါတယ်။
အလားတူ ဒီနေ့ မေလ ၂၃ ရက် မနက်ပိုင်းမှာလည်း ရပ်ကွက်(၇) လုံလော့ဈေးမှာ အမျိုးသမီးတစ်ဦးက ခေါက်ဆွဲ စားနေချိန် ကား ခိုးယူခံရတယ်လို့ နောက်ထပ် အမျိုးသားတစ်ဦးက ပြောပါတယ်။
ဒါ့အပြင် ဧပြီ ၂၁ ရက်မှာလည်း ကားဝယ်မယ်ဆိုပြီး လားရှိုးမြို့ ရပ်ကွက်(၅)ရှိ ရေကန်တောင်ဘက် ကားစမ်းမောင်းကြည့်ဖို့ အသက် ၃၈ နှစ်အရွယ် ကားပွဲစား ဦးဆန်းအောင်ဆိုသူကို အမျိုးသား ၂ ဦးက ခေါ်သွားခဲ့ရာ သတ်ဖြတ်ပြီး ကားယူကာ ထွက်ပြေးသွားတဲ့ဖြစ်စဉ်လည်း ဖြစ်ပွားခဲ့ပါတယ်။
ပြီးခဲ့တဲ့ ၂၀၂၅ ခုနှစ် အောက်တိုဘာ ၁၈ ရက်ကလည်း လားရှိုးမြို့ ရပ်ကွက်(၁၀)ရှိ တိုင်းရုံး လမ်းခွဲမှာ အမျိုးသားတစ်ဦးနဲ့ အမျိုးသမီးတစ်ဦးက ကားဝယ်ဖို့ စမ်းမောင်းကြည့်မယ်ဆိုပြီး Crown ကားတစ်စီး ခိုးယူထွက်ပြေးတဲ့ဖြစ်စဉ်လည်း ရှိခဲ့ဖူးပါတယ်။
လားရှိုးမြို့မှာ ဓားပြတိုက်မှုအပြင် လူသတ်မှု၊ ခိုးမှု မကြာခဏ ဖြစ်ပွားနေပြီး စစ်တပ်ဘက်ကလည်း လက်ရှိအချိန်ထိ ထိရောက်တဲ့ အရေးယူမှု လုပ်ဆောင်နိုင်တာ မရှိဘူးလို့ မြို့ခံတွေက ပြောဆိုကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
