ဝတ်ရည်၊ ဧပြီ ၃၀ ရက်၊ ဖားကန့်
ကချင်ပြည်နယ် ဖားကန့်မြို့မှာ သတ်ဖြတ်ခံထားရတဲ့ ဒေသခံ အလောင်း ၄ လောင်း တွေ့ရှိခဲ့တယ်လို့ ဖားကန့်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
အလောင်းတွေကို လုံးခင်းကျေးရွာ ဆေးရုံကုန်းအနီးမှာ လာရောက်စွန့်ပစ်ထားတာလို့ ဆိုပါတယ်။
“သိထားတာတော့ စစ်တပ်က သတ်ဖြတ်ထားတာပါ။ သတ်ဖြတ်ပြီးတော့ စွန့်ပစ်ထားတဲ့ ပုံစံမျိုးပါ။ ဘာလို့ဆို စစ်တပ်က မကြာခဏ သွားလာနေတဲ့ ဒေသခံတွေကို သတ်ဖြတ်တာမျိုးတွေ အမြဲတမ်း လုပ်လေ့ရှိတယ်လေ။ သတ်ခံရတဲ့ အလောင်းကတော့ ရက်အတော်ကြာနေပြီ။ မိန်းကလေးရဲ့ အလောင်းဆိုရင် ရက်ရက်စက်စက်သတ်ဖြတ်ထားတာ တွေ့ရတယ်” လို့ မြို့ခံ အမျိုးသားတစ်ဦးက ပြောပါတယ်။
စွန့်ပစ်ထားတဲ့ အလောင်းတွေရဲ့ အနံ့တွေ ဆိုးဝါးလာပြီး အနီးအနားက ဒေသခံတွေက အကြောင်းကြားတာကြောင့် တာဝန်ရှိသူတွေက လာရောက်သယ်ဆောင်ပေးခဲ့တာ ဖြစ်ပါတယ်။
သတ်ဖြတ်ခံရတဲ့ အလောင်းတွေထဲမှာ အမျိုးသမီး အလောင်း ၁ လောင်းနဲ့ အမျိုးသား အလောင်း ၃ လောင်းတို့ ဖြစ်ပါတယ်။
အလောင်းတွေ့ရှိခဲ့တဲ့ နေရာဟာ ဖားကန့် လုံးခင်းဆေးရုံဟောင်းနဲ့ ဂေါက်ကွင်းနေရာတွေမှာဖြစ်ပြီး အဲဒီနေရာတွေလည်း စစ်ကောင်စီတပ်နဲ့ ပြည်သူ့စစ်အဖွဲ့တွေ ပူးပေါင်းပြီး ထိန်းချုပ်ထားတဲ့ နေရာလည်း ဖြစ်ပါတယ်။
ဖားကန့်မှာ ပြီးခဲ့တဲ့ ဧပြီ ၂ ရက်ကစ တိုက်ပွဲတဖန် ပြန်လည်ပြင်းထန်လာတာဖြစ်ပြီး တိုက်ပွဲကြားက လက်နက်ကြီးကြောင့် ဒေသခံ ၁၂ ဦးထက်မနည်းလည်း ဒဏ်ရာရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
