ရွှေဖီမြေ၊ မေလ ၂၉ ရက်၊ ပန်ဆန်း
“ဝ”တပ်မတော်- UWSA ရဲ့ မြို့တော်ဖြစ်တဲ့ ပန်ဆန်းခေါ် ပန်ခမ်းမြို့မှာ တရုတ်နိုင်ငံသားတွေကို ဖမ်းဆီးချုပ်နှောင်ပြီး ပြန်ပေးဆွဲတဲ့ တရားခံ ယန်ရှင်း (Yan Xin)ဆိုသူကို ထောင်ဒဏ် ၄ နှစ် ချမှတ်ကြောင်း “ဝ”ပြည် တရားစီရင်ရေးကော်မတီ- WSP က သတင်းထုတ်ပြန်ပါတယ်။
ဖြစ်စဉ်ဟာ ပြီးခဲ့တဲ့ ဇန်နဝါရီ ၂၉ ရက်က ပန်ဆန်းမြို့တစ်နေရာမှာ ယန်ရှင်းက အခြားသူတွေကို လှုံ့ဆော်ပြီး တရုတ်နိုင်ငံသား ၁၀ ဦးကို ချုပ်နှောက်ကာ အဲဒီထဲက ၅ ဦးကို ပန်ဆန်းမြို့ရှိ ဟိုတယ်တစ်ခုမှာ ဆက်လက် ချုပ်နှောင်ခဲ့တာပဲ ဖြစ်ပါတယ်။
ယန်ရှင်းက ဖမ်းဆီးခံရသူတွေရဲ့ မိသားဝင်တွေဆီကနေ တရုတ်ယွမ်ငွေ ၁ သိန်းနဲ့ လာရောက် ရွေးထုတ်ဖို့ တောင်းခံခဲ့ပေမဲ့ နောက်ဆုံးမှာ မအောင်မြင်ခဲ့ဘူးလို့ ဆိုပါတယ်။
ဒါ့အပြင် ယန်ရှင်းဟာ အလုပ်လုပ်နေတဲ့ ကာလတစ်လျှောက်လုံး မူးယစ်ဆေးဝါးတွေကို ကြာရှည်စွာ သုံးစွဲကြောင်း စစ်ဆေးတွေ့ရှိခဲ့တာကြောင့် “ဝ”ပြည် အခြေခံဥပဒေ ပြဌာန်းချက်အရ ယန်ရှင်းဟာ “ရာဇသတ်ကြီး” အခန်း ၄ ပုဒ်မ ၁၉၇ မှာ ဖော်ပြထားတဲ့ တရားမဝင် ဖမ်းဆီးချုပ်နှောင်မှုကို ကျူးလွန်ထားသလို မူးယစ်ဆေးဝါး တားမြစ်ရေးအမိန့် ပုဒ်မ ၈ အပိုဒ်ခွဲ (၃)ကို ချိုးဖောက်ကျူးလွန်ခဲ့တယ်လို့ ဖော်ပြထားပါတယ်။
ဒါကြောင့် သူ့ကို တရားမဝင် ဖမ်းဆီးချုပ်နှောင်မှုနဲ့ ထောင်ဒဏ် ၁ နှစ်၊ မူးယစ်ဆေးဝါး သုံးစွဲမှုအတွက် ထောင်ဒဏ် ၃ နှစ် စုစုပေါင်း ထောင်ဒဏ် ၄ နှစ် ချမှတ်လိုက်တယ်လို့ ဆိုပါတယ်။
ဒါ့အပြင် ပန်ဆန်း ဟိုတယ်တစ်ခုမှာ အဆင့်မြင့် မန်နေဂျာ (စီမံခန့်ခွဲရေးဝန်ထမ်း)ဖြစ်တဲ့ စွန်းဖုန်းလင် (Sun Fenglin)ကို သူရဲ့ဟိုတယ်မှာ နိုင်ငံခြားသား ကျားဖျန့်တွေကို ရည်ရွယ်ချက်ရှိရှိ နေရာထိုင်ခင်း ပံ့ပိုးပေးပြီး စစ်ဆေးဖမ်းဆီးမှုကနေ ရှောင်တိမ်းနိုင်ဖို့ ကူညီပေးခဲ့တာကြောင့် ရာဇသတ်ကြီး အခန်း ၆ ပုဒ်မ ၂၆၆ ကို ချိုးဖောက်ကြောင်း ထင်ရှားတာကြောင့် ထောင်ဒဏ် ၁ နှစ် ချမှတ်ခံခဲ့ရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
