ဝတ်ရည်၊ ဇွန်လ ၁၁ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ တရုတ်-မြန်မာနယ်စပ်က မူဆယ်မြို့မှာ လုယက်မှုနဲ့ ဓားပြတိုက်မှုတွေ ဆိုးဆိုးဝါးဝါးဖြစ်နေပြီး မြို့တွင်းနေထိုင်သွားလာသူတွေအဖို့ လုံခြုံမှုမရှိဘူးလို့ ဒေသခံတွေက ရွှေဖီမြေကို ပြောပါတယ်။
ပြီးခဲ့တဲ့ ဇွန်လ ၈ ရက် နေ့လယ်ပိုင်းမှာတင် ဓားပြတိုက်မှုတစ်ခု ဖြစ်ပွါးခဲ့ရာ သိပ်မကြာခင် ညနေပိုင်းမှာလည်း လောက်ကိုင်မြို့ကနေ မူဆယ်မြို့မှာ ရေခဲချောင်း လာရောင်းတဲ့ တရုတ်အမျိုးသမီး ၁ ဦး က ပိုက်ဆံ လုယက်ခံခဲ့ရပါတယ်။
“သူက ရေခဲချောင်းရောင်းတာ။ လုယက်သွားတဲ့ သူတွေက ဆိုင်ကယ်နဲ့ လုသွားတာ။ ပိုက်ဆံက သိန်း ၂၀ ပါသွားတာတဲ့။ ရဲတွေကျတော့ ယွမ် ၂၀၀ ပဲတဲ့။ မူဆယ်မှာက နေ့တိုင်းလိုလို ဖြစ်နေတာ။ သတင်းမတက်လို့ မသိကြတာပဲရှိတာ” လို့ မူဆယ်မြို့ခံ အမျိုးသားတစ်ဦးက ပြောပါတယ်။
လုယက်ခံခဲ့ရတဲ့ ငွေပမာဏကို အတိအကျမသိရပဲ အဆိုပါ ကိစ္စနဲ့ ပတ်သက်ပြီး
အမျိုးသမီးက ရဲတွေထံ တိုင်ကြားထားပေမဲ့ ဒီနေ့အထိ တရားခံတွေကို ဖမ်းဆီးနိုင်တာ မရှိသေးဘူးလို့ မြို့ခံတွေက ပြောပါတယ်။
ဇွန်လ ၈ ရက်မှာပဲ မူဆယ်မြို့ တောင်ရပ်ကွက်မှာ နေထိုင်တဲ့ ရွှေအရောင်းအဝယ်လုပ်တဲ့ လင်မယားနှစ်ဦးကို အမည်မသိ အမျိုးသား ၄ ဦးက သေနတ်ထောက်ပြီး ဓားပြတိုက်သွားခဲ့ပါတယ်။
အဲဒီဓားပြတိုက်မှုမှာလည်း ရွှေတွေ အများအပြားပါသွားတယ်လို့ ပြောဆိုကြပြီး ရွှေဖီမြေအနေနဲ့က သီးခြားအတည်မပြုနိုင်ပါဘူး။
မူဆယ်မှာ ဓားပြတိုက်မှုအပါအဝင် လုယက်မှု၊ ပြန်ပေးဆွဲမှုနဲ့ လူသတ်မှုတွေက ဓလေ့တစ်ခုလို ဖြစ်နေပြီး အဲဒီအမှုတွေမှာ လက်နက်ကိုင်ဆောင်ထားတဲ့ ပြည်သူ့စစ်တွေလည်း ပါဝင်နေတာ တွေ့ရပြီး ဒီကိစ္စတွေက မူဆယ်မှာ အထူးအဆန်း မဟုတ်တော့ဘူးလို့ ဒေသခံတွေက ရွှေဖီမြေကို ပြောပါတယ်။
စစ်တပ် ထိန်းချုပ်ထားတဲ့ မူဆယ်၊ လားရှိုး၊ တာချီလိတ်၊ ကျိုင်းတုံ၊ တန့်ယန်းမြို့အပြင် အခြားမြို့တွေမှာ မူးယစ်ဆေးဝါး ရောင်းဝယ်သုံးစွဲသူနဲ့ လောင်းကစားဝိုင်း အရင်ကထက် များလာပြီး ခိုးမှု၊ လုယက်မှု၊ ဓားပြတိုက်မှုနဲ့ လူသတ်မှုလည်း မကြာခဏ ဖြစ်ပွားလျက် ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
