ရွှေဖီမြေ၊ ဇွန်လ ၁၁ ရက်၊ နမ့်ခမ်း
ရှမ်းမြောက် နမ့်ခမ်းမြို့နယ် ကောင်းတပ်ကျေးရွာ ပြန်လည်ထူထောင်နိုင်ရေးအတွက် မွန်တပ် (NMSP – AD/RMA) က သိန်း (၃၀၀) ပါဝင်ကူညီလှူဒါန်းပေးခဲ့သလို ကိုးကန့်တပ် – MNDAA အပါအဝင် မိုင်းလားကျန်းမာရေးကော်မတီလည်း လိုအပ်တဲ့ ဆေးဝါးနဲ့ အထောက်အပံ့ပစ္စည်းတွေ လှူဒါန်းပေးခဲ့ကြောင်း သိရပါတယ်။
ကောင်းတပ်ကျေးရွာ ပြန်လည်ထူထောင်နိုင်ရေးကော်မတီက အလှူခံဌာနကို လာမယ့် ဇွန်လ ၁၅ ရက်မှာ ပိတ်သိမ်းမယ်လို့ ကြေညာထားပြီး ဌာနပိတ်သိမ်းပြီးနောက်ပိုင်းမှာလည်း အလှူရှင်တွေအနေနဲ့ ထပ်မံလှူဒါန်းလိုရင် ပြန်လည်ထူထောင်ကော်မတီထံ တိုက်ရိုက်လှူဒါန်းတာ၊ သက်ဆိုင်ရာ ဥက္ကဌတွေထံ တိုက်ရိုက်ဆက်သွယ်လှူဒါန်းတာနဲ့ ထိခိုက်နစ်နာသူတွေထံ ကိုယ်တိုက်ကိုယ်ကျ သွားရောက်လှူဒါန်းတာမျိုး ပြုလုပ်နိုင်ကြောင်း ဆိုထားပါတယ်။
တိုင်းရင်းသား လက်နက်ကိုင်တပ်ဖြစ်တဲ့ ကချင်တပ် – KIO/KIA က ကျပ်သိန်း (၅၅၀)၊ “ဝ”တပ်မတော်- UWSA က ကျပ်သိန်း (၁ဝဝ) နဲ့ ရှမ်းပြည်တိုးတက်ရေးပါတီ- SSPP က ဆန်အိတ် (၂ဝ) နဲ့ ကျပ်သိန်း (၁ဝဝ)၊ ပြည်တွင်းပြည်ပရှိ ဒေသအသီးသီးက တအာင်း၊ ကချင်၊ ရှမ်း၊ တရုတ်၊ ခိုလုံလီရှော၊ ဗမာ စတဲ့လူထုတွေကလည်း ကောင်းတပ်ရွာ ပြန်လည်ထူထောင်နိုင်ရေးအတွက် ပါဝင်လှူဒါန်းခဲ့ကြပါတယ်။
မနေ့ ဇွန်လ ၁၀ ရက်အထိ ကောင်းတပ်ကျေးရွာ ပြန်လည်ထူထောင်ရေးကော်မတီက ကောင်းတပ်ပေါက်ကွဲမှုအတွက် အလှူငွေ သိန်းခြောက်ထောင်ကျော် (၆၉၈,၃၀၀,၁၀၀) ကျပ် အပြင် တရုတ်ယွမ် (၄၁,၃၈၆) ရရှိထားပါတယ်။
ဖြစ်စဉ်ကတော့ ပြီးခဲ့တဲ့ မေလ ၃၁ ရက်မှာ တအာင်းတပ် TNLA ရဲ့ ယမ်းဂိုဒေါင်ပေါက်ကွဲမှုကြောင့် ဒေသခံ ၄၁ ဦး သေဆုံးပြီး ဒဏ်ရာရရှိသူ ၁၅၄ ဦးအထိရှိခဲ့သလို နေအိမ် ၆၈၀ လည်း ပျက်စီးဆုံးရှုံးခဲ့ပြီး အဲဒီထဲမှာမှ မီးလောင်ပြာကျခဲ့တဲ့ နေအိမ် ၄၀ ကျော် ရှိပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
