ရွှေဖီမြေ၊ ဩဂုတ် ၄ ရက်၊ မြိုင်
မကွေးတိုင်း မြိုင်မြို့နယ်ထဲ စစ်ကောင်စီတပ်ရဲ့ စစ်ကြောင်းထိုးမှုကြောင့် ရက်နှစ်ဆယ်ကျော်အတွင်း ဒေသခံတွေရဲ့ နေအိမ် ၂၀၂ လုံးကို မီးရှို့ဖျက်ဆီးသွားခဲ့တယ်လို့ အညာမြေ အရပ်ဖက်လူမှုအဖွဲ့အစည်း- မြိုင်က မနေ့ ဩဂုတ် ၃ ရက်မှာ ထုတ်ပြန်ထားပါတယ်။
အဲဒီစစ်ကြောင်းတွေဟာ ပြီးခဲ့တဲ့ ဇူလိုင် ၁၃ ရက်ကနေ မနေ့ ဩဂုတ် ၂ ရက်အထိ ကျေးရွာတွေထဲ ဝင်ရောက်တပ်စွဲနေထိုင်ခဲ့ပြီး ဒေသခံတွေရဲ့ ပစ္စည်းကို ခိုးယူသွားတဲ့အပြင် နေအိမ်ကိုပါ မီးရှို့ဖျက်ဆီးခဲ့ပါတယ်။
ထိုးစစ်ဆင်နေတဲ့ စစ်ကြောင်းဟာ အင်အား ၉၀၀ နီးပါး ရှိတာကြောင့် ဒေသခံတွေအနေနဲ့ အသွားအလာ အထူးသတိထားကြဖို့ လိုအပ်တယ်လို့ အညာမြေ အရပ်ဖက်လူမှုအဖွဲ့အစည်း (မြိုင်)ရဲ့ တာဝန်ရှိသူတစ်ဦးက ပြောပါတယ်။
“ပထမစစ်ကြောင်းက စစ်ကားတွေ ရိက္ခာတွေ ထားခဲ့ပြီးမှ မြိုင်နယ်တောင်ပိုင်းက သွင်းမာဗျူဟာကို ပြန်သွားတာ။ အခုစစ်ကြောင်းက ဒုတိယစစ်ကြောင်းပါ။ အင်အားက ခန့်မှန်းခြေကတော့ ၇၀၀ ကနေ ၉၀၀ လောက်ရှိတယ်”
မီးရှို့ဖျက်ဆီးသွားတဲ့ ကျေးရွာတွေဟာ ပြီးခဲ့တဲ့ ဇူလိုင် ၁၃ ရက် ညမှာ ကန်နက်နဲ့ တတောတိုက်ရွာက နေအိမ် ၃၁ လုံး၊ ၁၄ ရက်နေ့မှာတော့ လက်ခုပ်ပင်ရွာက နေအိမ် ၂၉ လုံး၊ ၁၅ ရက်မှာ ညောင်ကုန်းရွာ နေအိမ် ၆ လုံး၊ ကိုင်းတောမရွာက နေအိမ် ၂ လုံးနဲ့ ထန်းငယ်တောရွာ နေအိမ် ၄ လုံး၊ ဇူလိုင် ၂၂ ရက်ကနေ ဩဂုတ် ၁ ရက်အထိ သင်းမရွာက နေအိမ် ၄၀ ကျော်နဲ့ ပြီးခဲ့တဲ့ ၂ ရက်မှာလည်း ဘောင်ဘင်ရွာက နေအိမ်အလုံး ၉၀ ကျော်ကို မီးရှို့ဖျက်ဆီးခဲ့တာပဲ ဖြစ်ပါတယ်။
စစ်တပ်ရဲ့ စစ်ကြောင်းထိုး ဝင်ရောက်မှုနဲ့ နေအိမ်မီးရှို့ဖျက်ဆီးမှုကြောင့် ကျေးရွာခံတွေဟာ လက်ရှိအချိန်ထိ ဘေးလွတ်ရာ ထွက်ပြေးတိမ်ရှောင်နေကြရဆဲ ဖြစ်ပါတယ်။
ဒါ့အပြင် မြိုင်မြို့နယ်ထဲ စစ်တပ်က နေ့စဉ်နီးပါး လက်နက်ကြီးနဲ့ လေကြောင်းတိုက်ခိုက်မှုကို ဆက်တိုက် ပြုလုပ်ခဲ့တာကြောင့် ဒေသခံတွေအနေနဲ့ သတိထားဖို့ လိုအပ်တယ်လို့ အညာမြေ အရပ်ဖက်လူမှုအဖွဲ့အစည်း (မြိုင်)ရဲ့ တာဝန်ရှိသူတစ်ဦးက ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
