ရွှေဖီမြေ၊ ဇူလိုင် ၃ ရက်၊ မလှိုင်
မန္တလေးတိုင်း၊ မြင်းခြံခရိုင်၊ မလှိုင်မြို့နယ်မှာ စစ်ကြောင်းထိုးနေတဲ့ စစ်ကောင်စီတပ်ကို တော်လှန်ရေးတပ်တွေဘက်က တိုက်ခိုက်ခဲ့ရာ ၂ ဦး သေဆုံးပြီး ၁၀ ဦး အရှင်ဖမ်းမိခဲ့တယ်လို့ ပြည်သူ့ကာကွယ်ရေးတပ် (PDF) က သတင်းထုတ်ပြန်ပါတယ်။
မနေ့က ဇူလိုင် ၂ ရက် နေ့လယ်ပိုင်းမှာ မလှိုင်မြို့နယ် အင်းကြီးတောရွာဘက်ကို စစ်ကြောင်းထိုးလာတဲ့ ဒုတိယရဲမှူးကြီး ဇော်ဝင်းထိန် ဦးစီးတဲ့ အင်အား ၁၁၀ ပါ စစ်ကြောင်းကို တော်လှန်ရေးတပ်တွေဘက်က တိုက်ခိုက်ခဲ့တာ ဖြစ်ပါတယ်။
တိုက်ခိုက်မှုအတွင်း စစ်ကောင်စီဘက်က ၂ ဦး သေဆုံးပြီး ၁၀ ဦးကို အရှင်ဖမ်းမိကာ လက်နက်မျိုးစုံ ၂၀ လက်အပါအဝင် ခဲယမ်းတွေကိုလည်း သိမ်းဆည်းရမိခဲ့တယ်လို့ ဆိုပါတယ်။
ဒီတိုက်ခိုက်မှုကို မြင်းခြံခရိုင်စစ်ဌာန တပ်ရင်းများ၊ မိတ္ထီလာခရိုင် အမှတ် (၂) တပ်ရင်း၊ မြင်းခြံခရိုင် (ပကဖ)၊ နွားထိုးကြီးမြို့နယ် (ပကဖ)၊ မလှိုင်မြို့နယ် (ပကဖ/TTA ပြောက်ကျားတပ်ဖွဲ့) တို့ ပူးပေါင်းပြီး တိုက်ခိုက်ခဲ့တာဖြစ်တယ်လို့ ဖော်ပြထားပါတယ်။
စစ်ကောင်စီတပ်ဘက်ကတော့ မလှိုင်မြို့နယ်မှာ စစ်ကြောင်းတိုက်ခိုက်ခံရတာနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
