ရွှေဖီမြေ၊ မေလ ၁၅ ရက်၊ ပုဏ္ဏားကျွန်း
အာရက္ခတပ်တော်- AA ထိန်းချုပ်ထားတဲ့ ပုဏ္ဏားကျွန်းမြို့မှာ စစ်ကောင်စီတပ်က လေကြောင်းနဲ့ တိုက်ခိုက်ခဲ့တယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ မေလ ၁၅ ရက် မနက် ၉ နာရီဝန်းကျင်မှာ ပုဏ္ဏားကျွန်းမြို့ စံပြရပ်ကွက်ကို ဂျက်ဖိုက်တာ ၂ စီးနဲ့ ပေါင် ၂၀၀ ဗုံး ၂ လုံး ကြဲချတိုက်ခိုက်ခဲ့တာလို့ ဆိုပါတယ်။
ဒေသခံ အမျိုးသားတစ်ဦးက “ထိခိုက်မှုတော့ မသိရသေးဘူး။ ဒီမနက်မှ လာချသွားတာလေဗျ။ အဆောက်အဦးတွေတော့ အများကြီး ပျက်သွားတာလေ။ ၅ လုံး ပျက်တယ်လို့တော့ သိထားတယ်” လို့ ပြောပါတယ်။
လူထိခိုက်တဲ့ အသေးစိတ် အချက်အလတ်ကိုတော့ ရွှေဖီမြေက မသိရသေးပါဘူး။
ပြီးခဲ့တဲ့ မေလ ၇ ရက်ကလည်း မင်းပြားနဲ့ ကျောက်တော်မြို့နယ်ထဲ ဂျက်ဖိုက်တာ ၄ စီးနဲ့ ည ၁၀ နာရီခွဲဝန်းကျင်မှာ ပေါင် ၅၀၀ ဗုံး ၈ လုံး ပစ်ခတ်တိုက်ခိုက်ခဲ့ဖူးပါတယ်။
စစ်တပ်ရဲ့ ဗုံးကြဲတိုက်ခိုက်မှုကြောင့် ဒေသခံ ၁ ဦး၊ အကျဉ်းထောင် ဆေးဝန်ထမ်း ၁ ဦးနဲ့ ကလေး ၁ ဦး သေဆုံးခဲ့ပြီး ဒဏ်ရာ ပြင်းထန်သူအပါအဝင် ၁၀ ဦး ထိမှန်ဒဏ်ရာ ရခဲ့ပါတယ်။
အလားတူ ဧပြီ ၁၉ ရက် မနက် ၁၀ နာရီမှာလည်း မြောက်ဦးမြို့နယ်ထဲ မြိုလူမျိုး နေထိုင်တဲ့ ကျောက်ဆည်ပြင်ရွာကို စစ်တပ်ဟာ လေကြောင်းကနေ ပေါင် ၅၀၀ ဗုံး ၂ လုံး ကြဲချတိုက်ခိုက်ခဲ့တာကြောင့် သံဃာတော်အပါအဝင် ၁၃ ဦး ဒဏ်ရာ ရရှိခဲ့ပါတယ်။
စစ်တပ်ဟာ အာရက္ခတပ်တော်- AA ထိန်းချုပ်နယ်မြေတွေကို ဗုံးကြဲတာတွေ ဆက်တိုက် ပြုလုပ်နေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
