ရွှေဖီမြေ၊ မေလ ၂ ရက်
တနင်္သာရီတိုင်း မောတောင်မြို့ပေါ်ကို စစ်ကောင်စီတပ်က လေကြောင်းတိုက်ခိုက်ခဲ့တာကြောင့် ၂ လသားအရွယ် ကလေးငယ်တစ်ဦးအပါအဝင် အရပ်သား ၃ ဦး ထိခိုက်ဒဏ်ရာရရှိခဲ့တယ်လို့ ကရင်အမျိုးသားအစည်းအရုံး – KNU က ထုတ်ပြန်ထားပါတယ်။
ဒီနေ့ မေလ ၂ ရက် နေ့လယ် ၂ နာရီဝန်းကျင်မှာ မောတောင်မြို့ပေါ်ရှိ ကျေးရွာတစ်ရွာကို စစ်ကောင်စီတပ်က ဂျက်ဖိုက်တာနဲ့ ပေါင် ၂၅၀ ဗုံးသီး ၂ လုံး ကြဲချတိုက်ခိုက်ခဲ့တာ ဖြစ်ပါတယ်။
ပြီးခဲ့တဲ့ ဧပြီ ၂၇ ရက်မှာလည်း မယ်ဝါး( သဲဖြူ) ကျေးရွာနဲ့ မောတောင်မြို့ပေါ်ရှိ ရပ်ကွက်အတွင်းကို စစ်ကောင်စီတပ်က ဂျက်ဖိုက်တာနဲ့ ပေါင် ၃၀၀ ဗုံး (၁၂) လုံးထက်မနည်း ကြဲချတိုက်ခိုက်ခဲ့တာကြောင့် ဒေသခံ ၂ ဦး သေဆုံးခဲ့ရပါတယ်။
ဒါ့အပြင် ပြီးခဲ့တဲ့ ဧပြီလ ၂၀ ရက်ကလည်း ခလယ်လွီထူခရိုင်၊ မူးမြို့နယ်က ပျဥ်းမပင်ကျေးရွာထဲကို စစ်ကောင်စီတပ်က လက်နက်ကြီးပစ်ခတ်ခဲ့တာကြောင့် ဒေသခံတစ်ဦး ထိမှန်ဒဏ်ရာရရှိပြီး နေအိမ် ၂ လုံးလည်း ပျက်စီးသွားခဲ့ပါတယ်။
စစ်ကောင်စီတပ်ဟာ နိုင်ငံတကာ တရားဝင်မှုရဖို့ကို အတုအယောင်ရွေးကောက်ပွဲ ပြုလုပ်ခဲ့ပြီး အတုယောင်အစိုးရဖွဲ့ဖို့ ကြိုးပမ်းနေပေမယ့် မြေပြင်မှာ အရပ်သားပြည်သူတွေကို ရည်ရွယ်ချက်ရှိရှိ ပစ်မှတ်ထားကာ လေကြောင်းတိုက်ခိုက်မှုနဲ့ လက်နက်ကြီး ပစ်ခတ်တိုက်ခိုက်မှုတွေကို ကျူးလွန်ပြီး စစ်ရာဇဝတ်မှုကိုလည်းပြောင်ပြောင်တင်းတင်း ကျူးလွန်လျက်ရှိကြောင်း ထုတ်ပြန်ချက်မှာ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
