ဝတ်ရည်၊ ဧပြီ ၂၂ ရက်၊ ဖားကန့်
တိုက်ပွဲတွေ ဖြစ်ပွါးနေတဲ့ ဖားကန့်မြို့မှာ ပုဂ္ဂလိကဆေးရုံက ဆရာဝန်နဲ့ ကျန်းမာရေးဝန်ထမ်း ၂၀ ဦးဝန်းကျင်ကို စစ်ကောင်စီတပ်က ဖမ်းဆီးခေါ်ဆောင်သွားခဲ့တယ်လို့ ဖားကန့်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဧပြီ ၂၁ ရက် ည ၁၀ နာရီခွဲမှာ ဖားကန့်မြို့ လုံးခင်းကျေးရွာအုပ်စု ရပ်ကွက် ၅ မှာ ဖွင့်လှစ်ထားတဲ့ မိုင် ပုဂ္ဂလိကဆေးရုံက ဆရာဝန်နဲ့ ကျန်းမာရေးဝန်ထမ်းတွေကို စစ်တပ်က ဝင်စီးပြီး ဖမ်းဆီးခဲ့တာလို့ ဆိုပါတယ်။
“ဆရာဝန်နဲ့ ဆရာမတွေဆိုရင် ၂၀ ယောက်လောက်တော့ ရှိတယ်လေ။ ညဆိုရင် ဒေသခံနေအိမ်တွေမှာလည်း ဝင်စီးတယ်။ လူတွေ့ရင် ဖမ်းတာမျိုးတွေ လုပ်တယ်”လို့ ဖားကန့်မြို့ခံတစ်ဦးက ပြောပါတယ်။
အဲဒီဆေးခန်းဟာ ဖားကန့်က ဒေသခံလူထုတွေအတွက် အရေးပါတဲ့ ဆေးခန်းဖြစ်ပြီး စစ်ကောင်စီတပ်က ဖမ်းဆီးသွားတဲ့ ဆရာဝန်နဲ့ ကျန်းမာရေးဝန်ထမ်းတွေကို ပြန်လွှတ်ပေးဖို့လည်း ဒေသခံတွေက တောင်းဆိုထားကြပါတယ်။
ဖားကန့်မှာ ပြီးခဲ့တဲ့ ဧပြီ ၂ ရက်ကစပြီး တိုက်ပွဲတွေ တဖန်ပြန်လည်ပြင်းထန်လာတာဖြစ်ပြီး တိုက်ပွဲကြားက လက်နက်ကြီးကြောင့် ဒေသခံ ၁၀ ဦးထက်မနည်းလည်း ဒဏ်ရာရရှိခဲ့ပါတယ်။
ဖားကန့်မြို့နယ်ပေါ်မှာ လက်ရှိအချိန်အထိ ကျန်ရှိနေသေးတဲ့ ဒေသခံလူထုတွေအနေနဲ့လည်း စစ်ကောင်စီတပ်ရဲ့ လေကြောင်းရန်ကို အထူးဂရုစိုက် နေထိုင်ကြဖို့ကိုလည်း တော်လှန်ရေးတပ်ဖွဲ့ဝင်တွေက တိုက်တွန်းထားပါတယ်။
ဒါ့အပြင် စစ်ကောင်စီတပ်က စစ်အင်အားတွေဖြည့်တင်းထားတဲ့ ဖားကန့်- ကားလမ်းပိုင်းကြီးကို ဒီနေ့ ဧပြီ ၂၂ ရက်မှစပြီး ရက်အကန့်အသတ်မရှိ ပိတ်လိုက်ကြောင်း KIA နဲ့ ပူးပေါင်းတပ်တွေက မနေ့ ဧပြီ ၂၁ ရက်မှာ ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
