မြတ်နိုး၊ ဇူလိုင် ၁၄
ကချင်ပြည်နယ်၊ မန့်ဝိန်းကြီး နဲ့ မိုင်ဂျာယန် လမ်းပိုင်း လာမယ့် ဇူလိုင်လ ၂၀ ရက်နေ့ကစပြီး စတင်ပြုပြင်တော့မှာ ဖြစ်တာကြောင့် ပြုပြင်မယ့် ကာလအတွင်း ကုန်တင်ကားကြီးတွေ သွားလာခွင့် ယာယီ ပိတ်မှာ ဖြစ်ကြောင်း ဒေသခံတွေဆီက သိရပါတယ်။
“လမ်းပြင်မှာ မန်ဝိန်းကြီးနဲ့ မိုင်ဂျာယန်ကြား ဟုတ်တယ်။ တရားဝင်စာလည်း ထွက်ထားပြီးသား။ လမ်းပြုပြင်နေတဲ့ ကာလအတွင်း ကားလေးတွေပဲ ဖြတ်လို့ရမယ်။ ကုန်တင်ကားကြီးတွေ ဖြတ်သန်း မသွားဖို့ ပေါ့” လို့ ဒေသခံ အမျိုးသား တစ်ဦးက ပြောပါတယ်။
မန်ဝိန်းကြီး – မိုင်ဂျာယန် လမ်းမပေါ်ရှိ နောင်မွန်ရွာနဲ့ လနားပါရွာကြား ခါ့တောင်းပါလမ်းက လာမယ့်ဇူလိုင်လ ၂၀ ရက်နေ့ ကနေ အောက်တိုဘာလ ၁၀ ရက်နေ့ အထိ ပြုပြင်သွားမှာဖြစ်ပြီး လမ်းပြုပြင်နေချိန် ကာလအတွင်း ဖြတ်သွား ဖြတ်လာ၊ ကုန်စည် သယ်ဆောင်မယ့် ကားကြီးတွေ အားလုံး သွားလာခွင့် ယာယီ ပိတ်ထားမယ်လို့ ဆိုပါတယ်။
“အခု လာမယ့် ဇူလိုင်လ ၂၀ ရက်နေ့ ကနေ ခါ့တောင်းပါ လမ်းလုပ်မယ်လို့ သိရတယ်။ ၁၀ လပိုင်းအထိ လမ်းလုပ်မယ်လို့ ကြားတယ်။ လမ်းပိတ်မယ်ထင်တယ်” လို့ နောက်ထပ် ဒေသခံ အမျိုးသမီး တစ်ဦးက ပြောပါတယ်။
လမ်းလုပ်ငန်းတွေ လုံခြုံစွာ ဆောင်ရွက်နိုင်ဖို့နဲ့ ယာဉ်အသွားအလာ အခက်အခဲတွေ မဖြစ်ပေါ်စေဖို့အတွက် ကုန်တင်ယာဉ်ကြီးတွေကို ယာယီကန့်သတ်ထားတာဖြစ်တယ်လို့ သူက ပြောပါတယ်။
မန့်ဝိန်းကြီး–မိုင်ဂျာယန် လမ်းကြောင်းဟာ ကချင်ပြည်နယ်အတွင်း ဒေသခံတွေရဲ့ နေ့စဉ်သွားလာရေးနဲ့ ကုန်စည်သယ်ယူပို့ဆောင်ရေးအတွက် အရေးကြီးတဲ့ လမ်းကြောင်းတစ်ခု ဖြစ်ပါတယ်။
အဲလမ်းကနေ ဒေသထွက် လယ်ယာထွက်ကုန်တွေ၊ စားသောက်ကုန်နဲ့ အခြေခံလိုအပ်တဲ့ ကုန်ပစ္စည်းတွေကို သယ်ယူပို့ဆောင်နေကြပြီး မန်ဝိန်းကြီး၊ မိုင်ဂျာယန်နဲ့ အနီးအနားကျေးရွာတွေကြား ဆက်သွယ်ရေးအတွက် အဓိက အားထားနေရတဲ့ လမ်းတစ်ခုလည်း ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
