ရွှေဖီမြေ၊ မေလ ၃၁ ရက်၊ နမ့်ခမ်း
နမ့်ခမ်းမြို့နယ် ကောင်းတပ်ကျေးရွာမှာ မိုင်းတွင်းကျောက်လုပ်ငန်းအတွက် သိုလှောင်ထားတဲ့ ယမ်းပျော့တွေ မတော်တဆပေါက်ကွဲမှု ဖြစ်ပွားခဲ့တယ်လို့ တအာင်းတပ်မတော်-TNLA က မေလ ၃၁ ရက်နေ့မှာ ရှင်းလင်းချက် ထုတ်ပြန်လိုက်ပါတယ်။
မေလ ၃၁ ရက်နေ့ နေ့လယ် ၁၂ နာရီခွဲဝန်းကျင် ကောင်းတပ်ကျေးရွာမှာ သိုလှောင်ထားတဲ့ ယမ်းပျော့တွေ ပေါက်ကွဲခဲ့တာဖြစ်ပြီး အဲဒီပေါက်ကွဲမှုကြောင့် ဒေသခံပြည်သူတွေ ထိခိုက်ဒဏ်ရာရခဲ့သလို နေအိမ်အချို့လည်း ပျက်စီးခဲ့ပါတယ်။
ဒီပေါက်ကွဲမှုကြောင့် အမျိုးသမီး ၂၅ ဦးနဲ့ အမျိုးသား ၃၀ ဦး ထိခိုက်ခဲ့ပြီး ဒဏ်ရာရသူ ဆယ်နဲ့ချီရှိတယ်လို့ ဒေသခံတွေဆီက ရွှေဖီမြေက စုံစမ်းသိရှိရပါတယ်။
အဆိုပါပေါက်ကွဲမှုကြောင့် ထိခိုက်ဆုံးရှုံးမှုတွေ ကြုံတွေ့ခဲ့ရတဲ့ ဒေသခံတွေအတွက် တအာင်းတပ်မတော်-TNLA အနေနဲ့ ကျန်ရစ်ခဲ့တဲ့ မိသားစုဝင်တွေနဲ့အတူ ဝမ်းနည်းတယ်လို့ ဆိုပါတယ်။
ပေါက်ကွဲမှုဖြစ်ပွားခဲ့တဲ့ ယမ်းပျော့တွေဟာ TNLA ရဲ့ စီးပွားရေးဌာနက မိုင်းတွင်းကျောက်လုပ်ရေးလုပ်ငန်းအတွက် အသုံးပြုဖို့ သိုလှောင်ထားတဲ့ ယမ်းပျော့ဖြစ်တယ်လို့ဆိုပါတယ်။
ဖြစ်စဉ်နဲ့ ပတ်သက်ပြီး ပေါက်ကွဲမှုဖြစ်ရတဲ့အကြောင်းအရင်းတွေကို အသေးစိတ် စုံစမ်းစစ်ဆေးပြီး တာဝန်ရှိသူတွေက ဥပဒေနဲ့အညီ အရေးယူဆောင်ရွက်သွားမှာ ဖြစ်တယ်လို့ ဆိုပါတယ်။
ဒါ့အပြင့် ပေါက်ကွဲမှုကြောင့် ထိခိုက်ဆုံးရှုံးခဲ့ရတဲ့ မိဘပြည်သူတွေအတွက် ကူညီကယ်ဆယ်ရေးလုပ်ငန်းတွေ ကျန်းမာရေးစောင့်ရှောက်မှုတွေနဲ့ ပြန်လည်းထူထောင်ရေးလုပ်ငန်းတွေကို သက်ဆိုင်ရာဌာနတွေနဲ့ ပူးပေါင်းပြီး အမြန်ဆုံးဆောင်ရွက်သွားမယ်လို့ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
