ရွှေဖီမြေ၊ ဖေဖော်ဝါရီ ၂၅ ရက်
“ဝ” တပ်မတော် – UWSA က မြန်မာ-လာအို-ထိုင်း ၃ နိုင်ငံနဲ့ နယ်စပ်ချင်းနီးစပ်တဲ့ မိုင်းဆက်ခရိုင် မိုင်းတုံမြို့နယ်မှာ ၎င်းတို့ ဖမ်းဆီးရမိတဲ့ မြန်မာကျပ်ငွေ ၁၀ ဘီလျံခန့် တန်ဖိုးရှိတဲ့ မူးယစ်ဆေးဝါးတွေကို စစ်ကောင်စီထံ လွှဲပြောင်းပေးခဲ့တယ်လို့ UWSA ရဲ့ ပြောရေးဆိုခွင့်ရှိသူ ဦးညီရန်းက ၎င်းရဲ့ လူမှုကွန်ယက်ပေါ်မှာ ဖော်ပြထားပါတယ်။
အဲဒီမူးယစ်ဆေးဝါးတွေကို ပြီးခဲ့တဲ့ ဖေဖော်ဝါရီ ၁၅ ရက်မှာ UWSA ရဲ့ စစ်ဒေသ ၁၇၁ ဖြစ်တဲ့ မိုင်းတုံမြို့နယ်ထဲက လီဆူကျေးရွာတစ်ရွာနဲ့ နမ့်ဟူးခွန်ကျေးရွာတွေမှာ ဖမ်းဆီးရမိခဲ့တယ်လို့ ဆိုပါတယ်။
လီဆူကျေးရွာတစ်ရွာအနီးမှာ ဖမ်းဆီးရမိတဲ့ ဘိန်းဖြူ ၁၂၀.၇၅ ကီလိုဂရမ်ဟာ စစ်ကောင်စီတပ် ထုတ်ပြန်ဖူးတဲ့ ကာလတန်ဖိုးအရ ကျပ်ငွေ ၆၀,၃၇၅ သိန်းရှိပြီး နမ့်ဟူးခွန်ကျေးရွာအနီးမှာတော့ စစ်ကောင်စီရဲ့ ပူးပေါင်းမှုနဲ့ (ICE) လို့ လူသိများတဲ့ (Methamphetamine) ၄၉၄ ကီလိုဂရမ် ဖမ်းဆီးရမိကာ စစ်ကောင်စီထုတ်ပြန်ဖူးတဲ့ ကာလတန်ဖိုးအရကတော့ ကျပ်ငွေသိန်းပေါင်း ၃၇,၆၃၀ တန်ဖိုးရှိပါတယ်။
အဲဒီ ၉.၈ ဘီလျံတန်ဖိုးရှိတဲ့ မူးယစ်ဆေးဝါးတွေနဲ့ မူးယစ်ဆေးဝါးရောင်းဝယ်တဲ့ ဦးအားပေ့နဲ့ ဦးယားပို့တို့နှစ်ဦးကို UWSA က စစ်ကောင်စီရဲ့ ရဲတပ်ဖွဲ့တွေနဲ့ ဆွေးနွေးပြီး အခမ်းအနားပြုလုပ်ကာ လွှဲပြောင်းပေးခဲ့တယ်လို့ ဆိုပါတယ်။
UWSA ဟာ ပြီးခဲ့တဲ့ ဖေဖော်ဝါရီ ၂ ရက်မှာလည်း တရုတ်သတင်းအချက်အလက်အပေါ် အခြေခံပြီး ၎င်းတို့ ဖမ်းဆီးရမိတဲ့ မြန်မာကျပ်ငွေ ၁၂ ဘီလျံတန်ဖိုးရှိ မူးယစ်ဆေးဝါးတွေကို ယုံဟော် (Yonghe) နယ်စပ်ဂိတ်ကနေတစ်ဆင့် တရုတ်ထံ လွှဲပြောင်းပေးခဲ့တယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
