ရွှေဖီမြေ၊ ဧပြီ ၂၁ ရက်
စစ်ရေးအစီအမံနဲ့ စုဖွဲ့မှုကောင်းပြီး တန်ပြန်တိုက်ပွဲတွေ ဖော်ဆောင်နိုင်ဖို့ဆိုပြီး တော်လှန်ရေးတပ်တွေ စုပေါင်းပြီး အမှတ်- ၁ အယ်လ်ဖာစစ်ဒေသ (မိုးဗြဲနယ်) တပ်ပေါင်းစုဖွဲ့စည်းကြောင်း ဒီနေ့ ဧပြီ ၂၁ ရက်မှာ ကြေညာချက် ထုတ်ပြန်ပါတယ်။
ပြီးခဲ့တဲ့ ဇန်နဝါရီ ၂၈ ရက်နဲ့ ၂၉ ရက်မှာ လူထုတွေရဲ့ တောင်းဆိုချက်အရ တပ်တစ်တပ်တည်းပေါင်းစည်းနိုင်ရေးအတွက် ညီလာခံပြုလုပ်ခဲ့ပြီး တူညီတဲ့ စစ်ရေး၊ နိုင်ငံရေးခံယူချက်နဲ့ လူထုအကျိုးကို ရှေ့ရှုနိုင်ဖို့ဆိုကာ အမှတ်- ၁ အယ်လ်ဖာစစ်ဒေသကို ဖွဲ့စည်းခဲ့တယ်လို့ ဆိုပါတယ်။
အမှတ်- ၁ အယ်လ်ဖာစစ်ဒေသဟာ ကရင်နီပြည်ကြားကာလ အုပ်ချုပ်ရေးကောင်စီ- IEC ရဲ့ ကာကွယ်ရေးဝန်ကြီးဌာနနဲ့ ကရင်နီအမျိုးသားများကာကွယ်ရေးတပ်- KNDF ရဲ့ စစ်ရေး၊ နိုင်ငံရေး အုပ်ချုပ်စီမံမှုအောက်မှာ တည်ရှိသွားမယ်လို့ ဖော်ပြထားပါတယ်။
အယ်လ်ဖာစစ်ဒေသကနေတစ်ဆင့် ညီညွတ်တဲ့ ကရင်နီပြည်တပ်ကို ဦးတည်ပြီး တော်လှန်ရေးလမ်းကြောင်းပေါ်မှာရှိတဲ့ စစ်ရေး၊ နိုင်ငံရေး စည်းလုံးမှုကို ပျက်ပြားစေမယ့်အရာတွေကို ဆန့်ကျင်သွားမယ်လို့ ဆိုထားပါတယ်။
အမှတ်- ၁ အယ်လ်ဖာစစ်ဒေသမှာ KNDF ရဲ့ ဗျူဟာ ၁ နဲ့ ဗျူဟာ ၈ ၊ ပြည်သူ့ကာကွယ်ရေးတပ်-အလယ်ပိုင်းတိုင်းက တပ်ရင်း/တပ်ဖွဲ့တချို့တချို့အပါအဝင် ဒေသကာကွယ်ရေးတပ်တွေနဲ့ မနေ့ ဧပြီ ၂၀ ရက်မှာ ဖွဲ့စည်းခဲ့တာ ဖြစ်တယ်လို့ ဒေသတွင်းသတင်းတွေမှာ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
