မိုင်းရူပ၊ ဧပြီ ၂၃၊ သိန္နီ
ကိုးကန့်တပ်- (MNDAA) ထိန်းချုပ်ထားတဲ့ ရှမ်းမြောက် သိန္နီမြို့နယ်မှာ တရုတ်လုပ်ငန်းရှင်တွေ ဆက်တိုက်ဝင်ရောက်နေပြီး ဒေသခံတွေရဲ့ မြေယာတွေ ဆက်တိုက်ဝယ်ယူနေတယ်လို့ ဒေသခံတွေက ရွှေဖီမြေကို ပြောပါတယ်။
တရုတ်လုပ်ငန်းရှင်တွေဟာ လမ်းမကြီးဘေးရှိ မြေယာတွေကို အဓိက ဝယ်ယူနေပြီး သိန္နီမြို့တွင်းမှာ အဆောက်အအုံတွေ ဆက်တိုက် ဆောက်လုပ်နေသလို တရုတ်လူမျိုးတွေ အများအပြား ဝင်ရောက်လာတယ်လို့ ဆိုပါတယ်။
“မြေတွေကို လမ်းမကြီးဘေးမှာ အဓိကထား ဝယ်တာတွေ့ရတယ်။ ရင်းနှီးမြှုပ်နှံလို့ကောင်းမယ့် နေရာတွေ ဝယ်တာပေါ့။ စျေးကျတော့ မြေယာပိုင်ရှင်နဲ့ ညှိနှိုင်းပြီး ဝယ်တာတော့။ ဘယ်လိုပေးတာလဲတော့ အဓိက မသိရဘူး။ မြို့ထဲမှာတော့ တော်တော်စည်လာတယ်” လို့ သိန္နီမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
မြေယာတွေကို တရုတ်လုပ်ငန်းရှင်တွေက ဝယ်ယူပြီး အဆောက်အအုံအသစ်တွေ ဆောက်လုပ်တာရှိသလို ငှက်ပျော၊ ကြံ စိုက်ပျိုးတာတွေလည်း ရှိတယ်လို့ မြို့ခံတွေထံက သိရပါတယ်။
ဒေသခံတွေက မြေယာတွေကို ဖိအားအမျိုးမျိုးကြောင့် မဖြစ်မနေရောင်းနေကြရတာဖြစ်ပြီး လုပ်ငန်းလုပ်ကိုင်ရာမှာလည်း တရုတ်တွေကို မယဉ်နိုင်တာကြောင့် အခက်အခဲတွေနဲ့ ကြုံတွေ့နေရတယ်လို့ ဆိုပါတယ်။
ဒါ့အပြင် သိန္နီမြို့ထဲမှာ ဆိုင်တွေရဲ့ ဆိုင်းဘုတ်တွေကို တရုတ်စာသားတွေကိုသာ အဓိက အသုံးပြုရပြီး တရုတ်စီမံကိန်းနဲ့ ဆောက်လုပ်တဲ့ အဆောက်အအုံအသစ်တွေ တိုးလာတယ်လို့ ဒေသခံတွေက ရွှေဖီမြေကို ပြောဆိုထားပါတယ်။
သိန္နီမြို့ကို ပြီးခဲ့တဲ့ ၁၀၂၇ စစ်ဆင်ရေးအတွင်း ကိုးကန့်တပ်က တိုက်ခိုက်သိမ်းယူခဲ့တာဖြစ်ပြီး သိန္နီမြို့ကို “မူပန်” မြို့ဆိုပြီး ကိုးကန့်တပ်က ပြောင်းလဲခေါ်ဝေါ်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
