ရွှေဖီမြေ၊ ဧပြီ ၂၃ ရက်
“ဝ” တပ်မတော် – UWSA က အွန်လိုင်းငွေလိမ်လည်မှု (ကျားဖျန့်) နဲ့ ဆက်စပ်သူ တရုတ်နိုင်ငံသား ၃၀ ဦးကို တရုတ်နိုင်ငံထံ ထပ်မံအပ်နှံလိုက်တယ်လို့ “ဝ” ပြည်တရားစီရင်ရေး ကော်မတီ – WSP က ဒီနေ့ ဧပြီ ၂၃ ရက်မှာ ထုတ်ပြန်ခဲ့ပါတယ်။
အဲဒီ တရားခံ ၃၀ ဦးနဲ့အတူ ငွေလိမ်လည်ရာမှာ အသုုံးပြုတဲ့ စက်ပစ္စည်းကိရိယာတွေကို မြန်မာ – တရုတ်နယ်စပ်ဖြစ်တဲ့ ပန်ဆန်း (ပန်ခမ်း) မြို့ရှိ မုန်အာ (Meng’a) နယ်စပ်ဂိတ်ပေါက်အနေတစ်ဆင့် တရုတ်ဆီ လွှဲပြောင်းပေးခဲ့တယ်လို့ ဆိုပါတယ်။
တရားခံ ၂၄ ဦးဟာ ကျားဖျန့်နဲ့ တိုက်ရိုက်ဆက်နွယ်မှုရှိတဲ့သူတွေဖြစ်ပြီး ကျန် ၆ ဦးဟာ “လစာကောင်းတယ်” ဟု လိမ်လည်လှည့်ဖြားခံရပြီး အတင်းစေခိုင်းခံရသူတွေဖြစ်တယ်လို့ ဆိုပါတယ်။
“ဝ” ပြည်တရားစီရင်ရေးကော်မတီဟာ ကျားဖျန့်အပေါ် “လုံးဝ သည်းခံမည်မဟုတ်” ဆိုတဲ့ မူဝါဒကို စွဲကိုင်ကာ တရားမဝင် နယ်စပ်ဖြတ်ကျော်မှုတွေကို တင်းတင်းကြပ်ကြပ် နှိမ်နင်းနေပြီး ဘယ်လိုပြစ်မှုကျူးလွန်သူမဆို “ဝ” ဒေသထဲ လုံးဝနေထိုင်ခွင့်ပြုမှာ မဟုတ်ကြောင်း ထုတ်ပြန်ချက်မှာ ဖော်ပြထားပါတယ်။
“ဝ” ပြည်တရားစီရင်ရေးကော်မတီက မနေ့ ဧပြီ ၂၂ ရက်မှာလည်း ကျားဖြန့်နဲ့ ဆက်စပ်မှုရှိတဲ့ အမျိုးသား ၇ ဦးနဲ့ တရုတ်အလိုရှိတဲ့ တရားခံ ၂ ဦးကို တရုတ်ဆီ လွှဲပြောင်းပေးခဲ့ပါတယ်။
ကျားဖြန့်နဲ့ ဆက်စပ်သူ တရုတ်နိုင်ငံသားတွေနဲ့ တရုတ်နိုင်ငံကနေ “ဝ” ပြည်ထဲ တရားမဝင်ဝင်ရောက်လာတဲ့ ပြစ်မှုကျူးလွန်ထားသူတွေကို WSP က ဖမ်းဆီးပြီး ဆက်တိုက်ပြည်ပြန်ပို့နေသလို ၄ လအတွင်း တရုတ်နိုင်ငံသား ၆၀၀ နီးပါး ပြည်ပြန်ပို့နိုင်ခဲ့တယ်လို့ ထုတ်ပြန်ချက်တွေအရ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
