ရွှေဖီမြေ၊ ဧပြီလ ၃၀ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ တရုတ်- မြန်မာနယ်စပ်က မူဆယ်မြို့နယ်မှာ တရားမဝင် နေထိုင်ကြသူတွေနဲ့ ကျားဖြန်လုပ်ကိုင်သူတွေကို ဖမ်းဆီးရမိခဲ့တယ်လို့ စစ်ကောင်စီက ထုတ်ပြန်ထားပါတယ်။
မူဆယ်မြို့နယ် တော်ရွက်ရပ်ကွက်မှာရှိတဲ့ ကျားဖြန်ရုံကို စစ်ကောင်စီက မနေ့ ဧပြီလ ၂၉ ရက်မှာ ဝင်ရောက်စီးနင်းခဲ့ပြီး ကျားဖြန်လုပ်ကိုင်သူ တရုတ်နိုင်ငံသား ၂ ဦးနဲ့ မြန်မာနိုင်ငံသား ၁၂ ဦ အပါအဝင် ၎င်းတို့အသုံးပြုတဲ့ အဆောက်အအုံ၊ စတားလင့်စက်တွေနဲ့ ဆက်စပ်ပစ္စည်းတွေကိုလည်း ဖမ်းဆီးရမိခဲ့တယ်လို့ ဆိုပါတယ်။
ဒါ့အပြင် မနေ့ ဧပြီလ ၂၉ ရက် ညနေ ၄ နာရီခွဲမှာလည်း မူဆယ်မြို့ ဟိုမွန်ရပ်ကွက်အတွင်းရှိ တရားမဝင် ဝင်ရောက်နေထိုင်ကြတဲ့ တရုတ်နိုင်ငံသား ၂၆ ဦးကို ထပ်မံဖမ်းဆီးရမိခဲ့တာ ဖြစ်ပါတယ်။
ပြီးခဲ့တဲ့ မတ်လ ၂၀ ရက်ကလည်း မူဆယ်မြို့နယ် ကောင်းမှုတုံရပ်ကွက်နဲ့ တော်ရွက်ရပ်ကွက်မှာရှိ ကျားဖြန်ရုံကို စစ်ကောင်စီက ဝင်ရောက်စီးနင်းခဲ့ပြီး တရုတ်နိုင်ငံသားနဲ့ မြန်မာနိုင်ငံသား ၈၀ ကျော်အပါအဝင် ၎င်းတို့အသုံးပြုတဲ့ အဆောက်အအုံ၊ စတားလင့်စက်တွေနဲ့ ဆက်စပ်ပစ္စည်းတွေကိုလည်း ဖမ်းဆီးရမိခဲ့ပါတယ်။
လက်ရှိမှာတော့ ဖမ်းဆီးရမိခဲ့တဲ့ တရားမဝင် နေထိုင်ကြတဲ့သူတွေနဲ့ ကျားဖြန်လုပ်ကိုင်သူတွေကို စစ်ကောင်စီက အရေးယူ ဆောင်ရွက်သွားမှာဖြစ်ပြီး ၎င်းတို့နောက်ကွယ်မှာ ပါဝင်ပတ်သက်သူတွေကိုလည်း စိစစ်ဖော်ထုတ်ကာ တရားဥပဒေနဲ့အညီ ထိရောက်စွာ အရေးယူနိုင်ဖို့ ဆက်လက်ဆောင်ရွက်သွားမယ်လို့ ထုတ်ပြန်ထားပါတယ်
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
