ဒီကျေးရွာထဲ ဗုဒ္ဓဘာသာဝင်တွေရဲ့ အလှူအတန်း လုပ်နေတဲ့ မြင်ကွင်းတွေ၊ ဘုရားရှိခိုးသံတွေ မြင်ရမှာဖြစ်သလို ဘုရားကျောင်းမှာ ခရစ္စယာန်ဘာသာဝင်တွေရဲ့ ဝတ်ပြုသံတွေလည်း ကြားရမှာပါ။
လက်နက်ကိုင်ပဋိပက္ခတွေကြား လူမျိုးရေး တင်းမာမှုတွေ ရှိနေတဲ့ ရှမ်းမြောက်ဒေသမှာ ဒီကျေးရွာကတော့ လူမျိုးမတူ၊ ဘာသာမတူသူတွေ အတူယှဉ်တွဲနေထိုင်နေဆဲဖြစ်တဲ့ နေရာတစ်ခု ဖြစ်ပါတယ်။
ဒီကျေးရွာဟာ လူမျိုးပေါင်းစုံ စုပေါင်းနေထိုင်တဲ့ တအာင်းဒေသ မန်တုံမြို့နယ်ထဲက အိမ်ခြေ ၃၀၀ ဝန်းကျင်ရှိတဲ့ မိုင်းဘော်ကျေးရွာပဲ ဖြစ်ပါတယ်။ မိုင်းဘော်ရွာမှာ တအာင်း၊ ကချင်၊ ရှမ်း၊ လီဆူ စတဲ့တိုင်းရင်းသားပေါင်းစုံ နေထိုင်ကြတဲ့အပြင် တရုတ်လူမျိုးလည်း အတူတကွ ယှဉ်တွဲနေထိုင်ကြပါတယ်။
ဒီလို လူမျိုးမတူ၊ ဘာသာမတူတဲ့ လူမျိုးစုတွေကြား ပဋိပက္ခမဖြစ်အောင် အတူယှဉ်တွဲနေထိုင်ကြသလို မတူကွဲပြားတဲ့ လွတ်လပ်စွာ ကိုးကွယ်ခွင့်ကိုလည်း အပြန်အလှန် အသိအမှတ်ပြု လေးစားကြပါတယ်။
