ပပ၊ ကျံရ်ဇူန် ဆငည်း 2၊ နောင်ခေဝ်
တိုအီးအရာပ်ကဲမှာန်းဒါႈ ဆိင်ဒဲႈ ကဝ်အီမိူဝ်ႈဇီုင်းကပ္လိူင်ခေဲင်ကဲ ဒေဲႈဆာင်းလာင်းဒဲႈ မဴင်ပ်ုန်တီႇခေဲင်ကတာည်း ကာည်း လာက်နာက်ပ်ုန်ကီုက်ခေဲင်တီုက်နာန်းနီန် အ်ုန်အီမိုႈ ဒီႎီရ်ထိင်ခြဲ တံပ်ကညာအာဏာဆီုက်ဇေဝ်ကဲ ခေဲင်လှံင်နောင်ခေဝ်နီန် ဂေါႇမိုႈတိုအီးအရာပ်ကဲ ဂီုည်ငျားဇာဝ်းဒေဂီုန်းမဴင်နီန်အောႏ။
ကောန်အီမာည်း ကဝ်အီကဇောည်ဒဲႈနီန်အူအီး က္လာင်းဒါႈ ဂေါႇမိုႈ တိုအီးအရာပ် ခေဲင်လှံင်နောင်ခေဝ်ကဲနီန် ဟာဝ်းပမာရ်မာ် ငျားဒေညဲ့မဴင်၊ ဟာဝ်းပဇီုင်းမာ် ငျားဒေညဲ့မဴင်၊ ရေဲန်ဆပဲဆငါးခေဲင်လိုင်းကဲနီန်မာ် ငျားဒေညဲ့ကဒံပ်မဴင်နီန် ဆဲႈဒါႇကတူႈကဲတဖေးဘာတ်နီန် ဘည်တိူဝ်လယံမ်းမာ်မိူဝ်ႈအေ့အောႏ။
ကောန်အီမာည်း ကဝ်အီကဇောည်ဒဲႈနီန် က္လာင်းဒါႈ “ဆာ်မိုႈအော ဟည်ဆိင်ဒဲႈခည်း ကဝ်အီနံပ်ဘည် နီပိင်ငျာကဲနီန် ဒေဲႈဆာင်းလာင်းချှာန်းမဴင်ကဲနီန်။ ဆာ်အာဝ်မိုႈမာ် တိုအီးအရာပ်ကဲ နံင်ဂီုည်ဆီုပ်ယံမ်းလိူည်”။
ကောန်အီမာည်း ကဝ်အီဒါႈရကႎိုည်နီန် ဆီုပ်က္လာင်းဘိုး ဆဲႈဒါႇဒီန် အ်ုန်အီမိုႈ ခည်ပဲန်ကရဲင်ပ္လေါည်ကတီုက်ကပဴင် ကာည်း အ်ုန်အီပဲန်လှေင်ပ္လေါည်ကတီုက်ကပဴင် ပရဝ်တောင်းခမ်း ခေဲင်လှံင်နောင်ခေဝ်နီန်မာ် မဴင်ပ်ုန်တီႇခေဲင်ကတာည်း ကာည်း လာက်နာက်ပ်ုန်ကီုက်ခေဲင်တီုက်နာန်းကဲနီန် အ်ုန်ဂီုည်ဆီုပ်မိူဝ်ႈဒါပယာ်ႈအောႏ။
မိူဝ်ႈဘိုးတိုအီးအရာပ် ကုလားကွဲကဲ ကောန်အီမာည်းအူအီး က္လာင်းဒါႈ ဂေါႇမိုႈ အ်ုန်ဂီုည်ဆီုပ်မိူဝ်ႈအူန်းဘိုးမဴင်ပ်ုန်တီႇခေဲင်ကတာည်း လှေအ်ုန်အီညှံမ်ပဒူႈ ကာည်း အီဟောည်ႇပဒူႈနီန် တိုအီးကဲအီရေဲန်မာရ် ကာည်း ဂီုင်ကဲနီန် မိူဝ်ႈအေ့ဘည်ႎီုန်အူန်းလံမ်ကဲအောႏ။
“ကံပ်ဘည်မိုႈမဴင်ပ်ုန်တီႇဖုင်မှောအာဝ်ဒါႈ ဂြိုခြီုင်ဖုင်မှောအာဝ်ဒါႈ ကံပ်ဖုင်ပ်ုန်မိုႈ ယဲကာည်းတိုအီးရဝ်ကဲ ယောခည်း။ အ်ုန်ဆမာပဲန်ယံမ်း။ ဂေါႇဘည်ဒီန် နံင်ဘာည်းကဇောည်ဒဲႈယဲ ဒေဲႈဆာင်းလာင်းဒဲႈမဴင်ကဲနီန်”
တောပ်ဘည်စြာင်း ပ်ုန်ကစုအူန်းဖုင်လံပ်ကဇောည်ကဲအူဖုင်နီန် ခေဲင်လှံင်နောင်ခေဝ်နီန် ဘံန်ဟောည်ႇပ္လေါည်ကတီုက်ကပဴင် တံပ်တအာင်း TNLA၊ ဖုင်ကပိုမ် ကာည်း တံပ်ကညာအာဏာဆီုက်ဇေဝ်ကဲ ပတောင်ခမ်းနီန် တိုအီးအရာပ်ကဲအီညဲ့မဴင်နီန် ဟည်ဂေါည် 50 အောႏ။
တောပ်ဘည်စြာင်း ပ်ုန်ကစုအူန်းဖုင်ယဲဆျှိုည်ဖီမျေနီန် ခေဲင်ဆန်ုမ် 2026 ဇူႈဒါကျံရ်ဇံန်နႎရီ ရောတ်ဘံင် ကျံရ်မေ ခေဲင် 5 ကျံရ်နီန် ပကပီုန်ဆျှံမ်ကဒါႇပိူည် ဂေါႇမဴင်ပ်ုန်တီႇခေဲင်ကတာည်းနီန် တောပ်ပည်ကောန်ကညောမ် 3 အီး အီယံမ်းဟာဝ်းဂေါည် 17 အီး တိုအီးကဲအီကတူႈဖေးဘာတ်ဟာဝ်းဂေါည် 17 အီးအောႏ။
ဘံန်ထိင်ခြဲဟာဝ်း တံပ်ဆီုက်တအာင်း TNLA ကာည်း တံပ်ဓနု DPLA ကဲ ခေဲင်လံပ်တီုက်နာန်း 1027 ဒေါန်အာရ် ခည်ဆန်ုမ် 2024 ခေဲင်ကျံရ်ဇူန်လည် 10 နီန် ဘံန်လှေင် 1 ဆန်ုမ်နီန် တံပ်ကညာအာဏာဆီုက်ဇေဝ်ကဲမာ် ဟည်ႎီရ်ထိင်ခြဲ ခည်ကျံရ်ဇူန်လည် ဆငည်း 16 ခေဲင်ဆန်ုမ် 2025 နီန်အောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
