ဆျှိုည်ဖီမျေ၊ ကျံရ်မေ ဆငည်း 5၊ လာဆေဝ်
ဘိူန်းအယ်နံပ်တောပ်ပ်ုန်က္လာင်း ကောန်အီပ်ုန်ကဝ်အီဂေါည်ခေဲင်ဇံင်အူအီးဒါႈ ပလာဆေဝ် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် ကောန်အီမာည်း 4အီး ကဲစီးဖါ်ႈလာ်ဒါဘိုတ် မှာတ်ဟာဝ်း ဆဲင်ကယ်ကာည်း ရိူန်း တကောန်အီပ်ုန်အူအီး ကဝ်အီဘဒေဲႈဆဲင်ကယ်နီန်အောႏ။
ခည်ကျံရ်မေ ဆငည်း 3 စူန်မှိူဝ်ကပံတ် 4နြီဒိူန် ကောန်အီမာည်း 4အီး ကဲအီဘိူန်းအဆာက် ကပံတ် 20ဆန်ုမ်ကဲနီန် စီးဖါ်ႈလာ်ဒါဘိုတ် မှာတ်ဟာဝ်းဆဲင်ကယ် တကောန်အီပ်ုန် ကဝ်အီဘဒေဲႈဆဲင်ကယ် ခေဲင်ကီုင်းလာဆေဝ် ဇံင် 1 ရီမ်းဒေင်ပါရမီ 6နီန်အောႏ။
ကောန်အီပ်ုန်ကဝ်အီဂေါည်ခေဲင်ဇံင်ဒီန်အူအီး က္လာင်းဒါႈ “ဒီဒီန် အ်ုန်အာဝ်ရာမ်မိူဝ်ႈစိတိုအီး။ ကဲနှဲဖါ်ႈဒါဘိုတ် မှာတ်ဟာဝ်းအဓမ္မ။ ဖါန်ဆဲ့ တိုအီးအာဝ်ဘာည်းဆေ”
ကောန်အီပ်ုန်ကဝ်အီကတူႈမှာတ်ဒီန် က္လာင်းဒါႈ ဆဲင်ကယ်ပ်ုန်မှာတ်ဟာဝ်းကဲဒီန်မိုႈ ဆဲင်ကယ် CZI ဂါ်ႈရေင် ခေဲင်ဒူးဘောက်မာ် တောပ်ဟာဝ်းရိူန်း 100ဆဲန်အောႏ။
ခည်ကျံရ်မေ ဆငည်း 2 ခိင်ညှာကပံတ် 9နြီဒိူန်မာ် ကောန်အီမာည်း 4အီး ကဲဘိူည်ရီန်းဒေ စိုန်ကညာဆဴင်ဂြိုခြီုင်ချှဲန် ပဇံင် 1 ခေဲင်ကီုင်းလာဆေဝ်မာ် အ်ုန်ဟည်ဘိူန်းဒေ ဒဝ်လောတ်ဟာဝ်းအောႏ။
ဘိူန်းအယ်နံပ် တောပ်ပ်ုန်က္လာင်းတိုအီးခေဲင်အရာပ်ကဲဒါႈ ဘည်ဘာည်းကဲနီန် ဘည်ဂေါည်ဂေါည်ပဲန်ဒေဲႈအ်ုန် ခေဲင်ကီုင်းလာဆေဝ် အမှုဘြား၊ အမှုမှာတ်ကာည်း အမှုရံပ်တိုည်းလာည်းရိူန်းကဲနီန် ဘိူည်ဂေါည်ဂေါည်မိူဝ်ႈမာ် အာဝ်မိူဝ်ႈစိ ဘည်ဘိူန်းတိုည်းဟာဝ်း တီုင်ဌာနအီကဆီုဝ်ကဆဲင်ကဲအောႏ။
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
