ဆုမွန်၊ ကျံရ်မေ ဆငည်း 3
ကောန်အီပ်ုန် ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းဒါႈ ခယ်ကဲ စိင်ဒေဲႈဖါ်ႈ ကဒါႇကုင်ကပိုမ်ဘြာန်နီန် ဒေဲႈရေဲန်ဟာဝ်း ရေင်လိုင်း ပအရာပ်ထိင်ခြဲ တံပ်ကိုကာင် MNDAA ကာည်း တံပ်ဆီုက် ‘ဝ’ UWSA ကဲအောႏ။
“ ကဲရေဲန်ဟာဝ်းညှံမ်လှေင်စိ။ ဆိင်မိုႈလိူည် 1 ကျံရ် 2 ကျံရ်။ ကဲအာဝ်ယာ်ႈႎီရ်စိ ရေင်လိုင်းပြီမ်။ ပ်ုန်ယိူဝ်းတိူရ်ႈယဲ ကဲရေဲန် အိုည်လှေ။ ဆာ်မိုႈရေင်လိုင်းရအာည်ႇနီန် အ်ုန်မိုႈပ်ုန်ရေဲန်ကမာည်း ရဘံန်အ်ုန် မိုႈရေင်လိုင်းကတာည်းထာင် ထာန်ဇာရ်အ်ုန်နံင်ထာန်တိုအီးအူကဝ်။ ခေဲင်ဒီန်အ်ုန်ဂီုည်မိူဝ်ႈအူန်းဘိုး ရေင်လိုင်းပြီမ်။ ဆာ်မိုႈရေင်လိုင်းပြီမ်ဒီန်မာ် ကဲအာဝ်ယာ်ႈစိ။ ဆာ်မိုႈဒီနံင်ပ္လေႈကဲတ ရေင်လိုင်းကဲနီန် အရာပ်ဒီန် ခယ်ကဲ တီႇအူန်းလာန်ယာန်ကဲ”
ကဲဒါႈ ဒီစိင်ဒေဲႈရေဲန်ဟာဝ်း ခယ်ကဲတ ရေင်လိုင်းကမာည်းနီန် အ်ုန်မိုႈဒီထိင်ခြဲ တံပ်ကိုကာင် MNDAA ကဲ ကဒါႇချင်းရွှေဟော်၊ ကြူကုတ်(ပန်ဆိုင်း) ရွှေလီ ကာည်း ဒီထိင်ခြဲ တံပ်ဆီုက်ဝ UWSA ကဲ ကဒါႇနမ့်တစ်(မန်ခါး)နီန် ဒီရေဲန်ဟာဝ်းကဲတရေင်လိုင်းခည်ဂီုန်း အ်ုန်မိုႈ ဒီထိင်ခြဲ တံပ်ကိုကာင်ကဲအောႏ။
ကောန်အီပ်ုန်နီန်ဒါႈဘိုး ဆဲႈဒါႇဒီန် အ်ုန်အီမိုႈ ဒီထိင်ခြဲ UWSA ကဲ ပနမ့်တစ်(မန်ခါး) ကဒါႇဂေတ်ဒီန်မာ် ကဲစိင်ဒေဲႈမှည်ဒီအာည်ႇနီန် စီရေဲန်ဟာဝ်းဘိုး ရေင်လိုင်းကမာည်းအောႏ။
ကဒါႇခယ်ကဲ ဘိူည်စိင်ဒေဲႈရေဲန်ဟာဝ်း ရေင်လိုင်းကဒါႇကုင်ကပိုမ်ဘြာန်နီန်မာ် ကဆီုဝ်တံပ်ကိုကာင် ကာည်း တံပ်ဆီုက်ဝကဲ ညှံမ်မိူဝ်ႈစိဘည်ပ္လိူရ်ႈလေႈ အူလှေအူနဲအောႏ။
ကဇေန်နီး တိုအီးအရာပ်ကဲ ဘိူည်လည်ဟာင်းတေင်လဲင်မာ် မိုႈတ ကဒါႇခယ်ကဲ ဘိူည်စိင်ဒေဲႈရေဲန်ဟာဝ်း ရေင်လိုင်းနီန်မာ် အာဝ်ယိူဝ်းစိ ဘည်ႎီရ်ယကဲႎီရ်ရေဲန်ႎီရ်ဘာည်းအောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
