နော်ဂျား၊ ကျံရ်ဇူန် ဆငည်း 17၊ မူစယ်
ဘိူန်းအယ်တခေါရ်နံပ် မိုႈတ ခံင်မဝ်း Happy water, ရာမ၊ ice ကာည်း K ပ်ုန်ဘိူန်းတိုည်းအူန်း ဖုင်တီုက်ယာႈခံင်မဝ်း စနဲ (22) ပကီုင်းမူစယ် အ်ုန်အီမိုႈကီုင်းကအူရ်နီန် ကဲဟည်ႎီရ်ယံင်းဖါ်ႈ ခေဲင် SPA, KTV ပါ်ဒိုႇဒိုည်ႇကာည်း ယုင်ကတော်အီဒါင်း၊ ယုင်ကတော်အီဒဲႇ ကဲအီဂေါည်ခေဲင်ကီုင်းမူစယ် ဂီုည်ဟြီုက်ဖါ်ႈ ကနာည်အကျိုးတိုကဲအောႏ။
အွံရ်နာန်းပလိက်အူအီး က္လာင်းတဆျှိုည်ဖီမျေဒါႈ “ပလိက်ကဲကံပ်နံပ်အူန်း မိုႈတအီးယံင်း K ကာည်း ရာမနီန် ခေဲင်ယုင်ကတော်ကာည်း KTV။ ကံပ်အာဝ်တိုည်းလိူည်။ ဆေဘာည်းကဲစီအာဝ်တိုည်းနီန်မိုႈ တိုကဲမိုႈအီဆူည်ႇဒီး။ ဆာ်မိုႈ တားပလိက် SB ကိုကြိုင်နီန် ဆူည်ႇပွံတ်ကဲယံင်း တောပ် Kg အ်ုန်။ ပလိက်ကဲနံပ်ဒိုည်ႇ”
ဘိူန်းအယ်နံပ် ပလိက်ကဲအီနံပ်ဘည်မိုႈဘည်ဘာည်းကဲဒိူန် ဒါႈ ကညာဖိင် ကဲအီဂေါည်ပဇံင်ဆော်ည်ဆော် ဒေင် 1၊ ဒေင် 3ကာည်း ဒေင်4နီန် ဖုင်တီုက်ယာႈခံင်မဝ်းကဲ တိုည်းနှဲလိူည်အရာင် ဆာ်မိုႈအီယံင်းကဲဒိူန်စီအာဝ်တိုည်း လာည်းဖါ်ႈရိူန်း ခွါင်းဒဲႈကဲႎိူဝ်ႈအောႏ။
အ်ုန်အီဂေါည်တောပ် ကဝ်အီတိူဝ်ႈဆဒါင် ပ KTV နီန်အူအီး က္လာင်းတဆျှိုည်ဖီမျေဒါႈ “ဇူႈပွံတ် ဘံန်ဟောည်ႇဆီမ်းဟာဝ်းတအာဏာ ဂီုည်ယံင်း ဂီုည်ဒါလိူရ်ႈပွံတ် ခံင်မဝ်းကဲနီန် ပ SPA ကာည်း KTV။ တံင်ဒါင်းအ်ုန် မိုႈပွံတ်ကောန်ကညောမ်ကဲ ဟည်ညွံတ်ဒေဲႈ K။ ဟောည်ႇညွံတ်ဖါ်ႈ K မိုႈလိူည်ဘည်ယိူဝ်းအယ် ကောန်အီပ်ုန်ကဲမာ် ကာ။ ဆဒေါကံပ်အာဝ်တံက်တတို”
ဘိူန်းအယ်တခေါရ်နံပ် ဘည်မိုႈ KTV အီမိူဝ်ႈလည်ဆီန်ကာည်း KTV အီအာဝ်မိူဝ်ႈလည်ဆီန် ကဲအီဂေါည်ခေဲင်ကီုင်းမူစယ်ကဲနီန် ဘိူည်အာဝ်လိုဒဲႈရိူန်းမာ် ဆာ်မိုႈကဲအီႎိူဝ်ႈရူမ် ခံင်မဝ်းကာည်း ယုင်ဒီယံင်းတိုပိုင်းကာမကဲနီန် တောပ်ဘည်ယုင်ဒဲႇယုင်ဒါင်း ဘ်ုပ်ဒဲႈ ယိူဝ်ႇ 25ဆဲန် ရောတ်ပွံတ်ဘံင် 100ဆဲန်အောႏ။
ဘိူန်းဘိုးအယ်တခေါရ်နံပ် ဘည်မိုႈ ဖုင်ပလိက်လှံင်ကာည်း အိူင်မူစယ်ကဲ အူန်းဖါ်ႈခံင်မဝ်းနီန်မိုႈ အမဒါင်းအ်ုန် ကဲစေတ်ပွံတ်ကားကဲအီဟာဝ်းႎီရ် ပဇံင်ဆော်ည်ဆော်၊ မံင်ဂလာမူစယ်ကာည်း တောင်ရပ်ကွက်ကဲနီန် ဆာ်ကဲယိူဝ်းမာ် ကဲဆီမ်းအူန်းပွံတ်ဂြို တိုအီးမာ် ကဲဆူည်ႇဘိုးဒေဲႈကရောႈ ဒါရိူန်းယူန် ယိူဝ်ႇ 1မှီုန် ရောတ်ဘံင်ယူန် 1ဆဲန် (ယိူဝ်ႇ 60ဆဲန်ဘျာ ရောတ်ဘံင် 600ဆဲန်ဘျာ) အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
