ဆျှိုည်ဖီမျေ၊ ကျံရ်ဇူန် ဆငည်း 24၊ လာဆေဝ်
ဘိူန်းအယ်နံပ် တောပ်ဘည်က္လာင်းတိုအီးအရာပ်ကဲဒါႈ ပကပီုန်ဆျှံမ်ကဒါႇပိူည်ခေဲင်လှံင်လာဆေဝ် ပရဝ်တောင်တလောင်နီန် ကောန်အီပ်ုန်အူအီး ငျားဒေတံင်ဟောမ် တီႈပ်ုန်လေႈရီမ်းပြောဂါင်နီန် ပဲန်ဖါ်ႈကဘူး ယံမ်းဟာဝ်းအောႏ။
တိုအီးအရာပ်ဒီန် ကောန်အီပ်ုန်အူအီး က္လာင်းတဖုင်ဆျှိုည်ဖီမျေဒါႈ ခည်ကျံရ်ဇူန် ဆငည်း 20 ခီညှာဒိူန် ဒေါ်အေးနွမ် ဘိူန်းအဆာက် 52 ဆန်ုမ်နီန် ကဘူးဖါ်ႈတီႈနီန် စီယံမ်းဟာဝ်းပယုင်ဆနံမ်ဒါင်းနီန်အောႏ။
အ်ုန်က္လာင်းဒါႈ “တိုအီးရဝ်အူအီး အ်ုန်တံင်ဟာပ်တီႈနီန် စီယံမ်းဟာဝ်း။ အာဝ်မိုႈစိ တီႈလေႈခေဲင်ဘြည်။ အ်ုန်မိုႈတီႈလေႈ ရီမ်းပြောဂါင်အ်ုန်စီ တံင်ဟာပ်။ ဂေါည်ဒီန် အ်ုန်စီကဘူးဖါ်ႈတီႈဒီန် ယံမ်းဟာဝ်း”။
ဘိူန်းအယ်နံပ် ဘံန်ကဘူးဒေါ်အေးနွမ်နီန် ဂေါႇမိုႈအာဝ်ဘိူန်းဆနံမ်းအ်ုန် တောပ်အခိင်နီန် ပဲန်ဖါ်ႈချူမ်ဟာဝ်းအဆာက်အ်ုန် ကဇေန်နီး ရမာဒေါ်အေးနွမ်ကဲရေဲန်ဟာဝ်း ကာန်အ်ုန်ပဂါင်အ်ုန်အောႏ။
တိုအီးအရာပ်ကဲ ပ္လူႈဆဒိဒါႈ ခိင်နီန်အ်ုန်မိုႈ ခိင်က္လာည်း ခိင်လေႈဂီုန်းတီႈနီန် ဂေါႇဘည်ဒီန် တောန်ဆန်ုမ် ယိူဝ်ႇတကဲတံင်ဟောမ်တီႈနီန် ပဲန်ဖါ်ႈကဘူး ဂီုည်မိူဝ်ႈဘည်ယံမ်းဟာဝ်းနီန် ကဆီုဝ်ကူန်ရဝ်မာဂါင်ကဲ အ်ုန်လိုခည်းအူန်းဆဒိအောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
