သုတ၊ မတ်လ ၁၆ ရက်၊ ကွတ်ခိုင်
တအာင်းတပ်မတော် – PSLF/TNLA ထိန်းချုပ်ထားတဲ့ ရှမ်းမြောက် ကွတ်ခိုင်မြို့ကို ကိုးကန့်တပ် – MNDAA က နှစ်ရက်ကြာ ထိုးစစ်ဆင်တိုက်ခိုက်ခဲ့ပြီး မြို့တစ်ခုလုံးကို ထိန်းချုပ်လိုက်ပြီလို့ ဒေသခံတွေက ပြောပါတယ်။
မနေ့ မတ်လ ၁၅ ရက်မှာ ကိုးကန့်တပ်ဘက်က ဒရုန်းကို ရာနဲ့ချီ အသုံးပြုကာ တအာင်းတပ် ထိန်းချုပ်ထားတဲ့ ကွတ်ခိုင်ဗျူဟာကုန်းကို အပြင်းအထန် ထိုးစစ်ဆင် တိုက်ခိုက်ခဲ့ပြီး မနေ့ညနေပိုင်းမှာ တအာင်းတပ်ဘက်က ဆုတ်ခွာပေးလိုက်ပြီလို့ ဆိုပါတယ်။
“ကွတ်ခိုင်က ကိုးကန့်လက်အောက် ကျသွားပြီ။ မနေ့ညပိုင်းမှာ TNLA ဆုတ်သွားတာ။ မြို့ပေါ်မှာ လူအသွားအလာက ပုံမှန်ပဲ” လို့ ကွတ်ခိုင်ဒေသခံတစ်ဦးက ရွှေဖီမြေကို ပြောပါတယ်။
ကွတ်ခိုင်မြို့အပြင် မူဆယ် (၁၀၅) မိုင်နဲ့ ကွတ်ခိုင်မြို့နယ် နမ့်ဖတ်ကာကျေးရွာရှိ TNLA ရဲ့ တပ်စခန်းအားလုံးကို ကိုးကန့်တပ်ဘက်က မနေ့ မတ်လ ၁၅ ရက်အထိ စီးနင်းတိုက်ခိုက် သိမ်းပိုက်လိုက်တာလို့ မြေပြင်သတင်းအရင်းအမြစ်တွေက ပြောပါတယ်။
ဒီနေ့ မတ်လ ၁၆ ရက်မှာတော့ ကွတ်ခိုင်မြို့နယ် နမ့်ဖတ်ကာနဲ့ နမ့်ခမ်းကြား ၁၂ မိုင်ကျေးရွာရှိ TNLA ရဲ့ တပ်စခန်းတွေကို ကိုးကန့်တပ်ဘက်က ဒရုန်းအသုံးပြုကာ ဗုံးကြဲတိုက်ခိုက်နေတယ်လို့ ဒေသခံတွေက ပြောပါတယ်။
တအာင်းတပ်ဘက်ကတော့ ဒီနေ့ မတ်လ ၁၆ ရက်အထိ ခုခံကာကွယ်နေပြီး ကိုးကန့်တပ်ဖွဲ့ တည်ရှိရာကို ထိုးစစ်ဆင်တိုက်ခိုက်တာ မရှိသေးဘူးလို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
