ရွှေဖီမြေ၊ ဧပြီ ၉ ရက်
ဓနုတော်လှန်ရေး လက်နက်ကိုင်အင်အားစု၊ အရပ်ဖက်အဖွဲ့အစည်း၊ အမျိုးသမီးနဲ့လူငယ်၊ ပညာရှင်၊ CDM၊ ၈၈ မျိုးဆက်၊ စာပေနဲ့ယဉ်ကျေးမှု ဖွံ့ဖြိုးတိုးတက်ရေးအတွက် တက်ကြွလှုပ်ရှားသူ၊ ပြည်တွင်းပြည်ပရှိ ဓနုအင်အားစုအားလုံးပါဝင်တဲ့ ဓနုအမျိုးသားအဆင့် ဆွေးနွေးညှိနှိုင်းပွဲဖိုရမ်ကို အဆင့်ဆင့် ကျင်းပပြုလုပ်ခဲ့ပြီး ဓနုအမျိုးသားဖက်ဒရယ်ကောင်စီ- DNFC ကို ဖွဲ့စည်းခဲ့တယ်လို့ ထုတ်ပြန်ချက်အရ သိရပါတယ်။
DNFC ကို ၂၀၂၆ ခုနှစ် ဇန်နဝါရီ ၃၁ ရက်မှာ ကောင်စီဝင် ၁၁ ဦးနဲ့ အောင်မြင်စွာ ဖွဲ့စည်းခဲ့တာဖြစ်ပြီး နိုင်ငံရေး ရည်မှန်းချက်၊ ရှေ့လုပ်ငန်းစဉ်နဲ့ ကောင်စီရဲ့ ဖွဲ့စည်းပုံ အခြေခံမူဘောင်တွေကို အားလုံးသဘောတူညီမှုနဲ့ စနစ်တကျ ရေးဆွဲအတည်ပြုနိုင်ခဲ့သလို ဦးတည်ချက် ၃ ရပ်ကို ရှင်းလင်းဖော်ပြခဲ့ပါတယ်။
ပထမဦးတည်ချက်ကတော့ လူမျိုးစုတို့ရဲ့ ကိုယ်ပိုင်ပြဌာန်းခွင့်နဲ့ ရိုးရာယဉ်ကျေးမှုတွေကို ပျက်သုဉ်းစေတဲ့ စနစ်အမျိုးမျိုးနဲ့ စစ်အာဏာရှင်စနစ်အပါအဝင် အာဏာရှင်အမျိုးမျိုးကို နည်းလမ်းမျိုးစုံနဲ့ တော်လှန်သွားမယ်လို့ ဆိုပါတယ်။
ဒုတိယဦးတည်ချက်က လူမျိုးစုအားလုံးနဲ့ ပြည်ထောင်စုအရေးဟာ ဓနုလူမျိုးရဲ့အရေးဖြစ်သလို ဓနုလူမျိုးတို့ရဲ့ အရေးကလည်း လူမျိုးစုအားလုံးနဲ့ ပြည်ထောင်စုအရေးအဖြစ် သန္နိဌာန်ချကာ တော်လှန်ရေးအင်အားစု၊ မဟာမိတ်အဖွဲ့အစည်း၊ အခြားသော လူမျိုးစုနဲ့ လက်တွဲပြီး အမျိုးသားတန်းတူရေး၊ ကိုယ်ပိုင်ပြဌာန်းခွင့်ကို အာမခံတဲ့ ဖက်ဒရယ်ဒီမိုကရေစီ ပြည်ထောင်စု ပေါ်ထွန်းရေးအတွက် တက်ကြွစွာ ပူးပေါင်းဆောင်ရွက်သွားမယ်လို့ ဖော်ပြထားပါတယ်။
နောက်ဆုံးတစ်ချက်ကတော့ ဒေသတွင်း လူမျိုးစုတွေ ငြိမ်းချမ်းစွာ အတူတကွ ယှဉ်တွဲနေထိုင်ရေး၊ ရေရှည်တည်တံ့တဲ့ ငြိမ်းချမ်းရေး၊ အမျိုးသား တန်းတူညီမျှရေး၊ လူ့အခွင့်အရေးနဲ့ လူမှုစီးပွားဘဝ ဖွံ့ဖြိုးတိုးတက်ရေးတို့ကို ရှေးရှုတဲ့ မူဝါဒတွေကို ချမှတ်အကောင်အထည်ဖော်မယ်လို့ ဆိုပါတယ်။
DNFC ဟာ ဓနုလူထုတစ်ရပ်လုံးကို နိုင်ငံရေးအရ စုပေါင်းခေါင်းဆောင်မှု ယန္တရားတစ်ခု ဖြစ်သလို အကြောင်းအမျိုးမျိုးကြောင့် လက်ရှိအဆင့်မှာ မပါဝင်နိုင်သေးတဲ့ ဓနုအင်အားစု၊ အဖွဲ့အစည်းနဲ့ ပညာရှင်အားလုံးကိုလည်း ဓနုအမျိုးသားရေးဆိုင်ရာ ရည်မှန်းချက်တွေ ဖော်ဆောင်ရာမှာ အတူတကွ ပူးပေါင်းလက်တွဲဆောင်ရွက်သွားဖို့ တိုက်တွန်းထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
