ရွှေဖီမြေ၊ ဇွန်လ ၁၄ ရက်
“ဝ” ပြည်တရားရေးကော်မတီ – WSP က “ဝ” ပြည်နယ် တရားဥပဒေစီမံခန့်ခွဲရေးကော်မတီ ပါတီကော်မတီရဲ့ ဆုံးဖြတ်ချက်အရ “ပြည်သူ့လူထု ကြီးကြပ်စောင့်ကြည့်ရေးစနစ်” ကို တည်ဆောက်လိုက်တယ်လို့ မနေ့ ဇွန်လ ၁၄ ရက်မှာ ထုတ်ပြန်ခဲ့ပါတယ်။
ရဲတပ်ဖွဲ့ဝင်တွေရဲ့ ဥပဒေစိုးမိုးရေးလုပ်ငန်းတွေကို ပိုမိုစနစ်တကျဖြစ်စေဖို့၊ ပြည်သူ့အကျိုးပြု ဥပဒေစိုးမိုးရေးဝါဒကို အကောင်အထည်ဖော်ဖို့၊ ဥပဒေစိုးမိုးရေးအပေါ် ပြည်သူတွေရဲ့ ယုံကြည်မှုနဲ့ ကျေနပ်မှုကို မြှင့်တင်ဖို့ စတဲ့ရည်ရွယ်နဲ့ ပြောင်းလဲခြင်းဖြစ်တယ်လို့ ဖော်ပြထားပါတယ်။
ဒါကြောင့် ပြည်သူတွေအနေနဲ့ ရပ်တပ်ဖွဲ့ဝင်တွေမှာ ဥပဒေစိုးမိုးရေး မဆောင်ရွက်ခြင်း၊ တရားမျှတမှုရရှိအောင် မဆောင်ရွက်ခြင်း၊ အာဏာအလွဲသုံးစားပြုခြင်းနဲ့ ကိုယ်ကျိုးအတွက် ဥပဒေကို လက်တစ်လုံးခြားပြုလုပ်ခြင်းစတဲ့ အပြုအမှုတွေရှိပါက တိုင်ကြားနိုင်တယ်လို့ ဆိုပါတယ်။
ဒါ့အပြင် ရဲတပ်ဖွဲ့ဝင်တွေအနေနဲ့ ဥပဒေစိုးမိုးရေးလုပ်ငန်းတာဝန်ထမ်းဆောင်တဲ့အချိန်မှာ အလုပ်သက်သေခံကတ်ပြားပြရမှာဖြစ်ပြီး မပြရင် ဥပဒေစိုးမိုးရေးဆိုင်ရာစည်းမျဉ်းချိုးဖောက်မှု အဖြစ်သတ်မှတ်မယ်ဖြစ်ကာ ပြည်သူတွေအနေနဲ့ တိုင်ကြားရာမှာလည်း တိုင်ကြားခံရတဲ့ ရဲတပ်ဖွဲ့ဝင်တွေရဲ့ သက်သေခံကတ်ပြားနံပါတ်ကိုပေးဖို့ လိုအပ်တယ်လို့ ထည့်သွင်းဖော်ပြထားပါတယ်။
ပြည်သူတွေရဲ့ တရားဝင်ပိုင်ဆိုင်မှု၊ ဂုဏ်သိက္ခာ ဒါမှမဟုတ် အခြားတရားဝင်အခွင့်အရေးတွေကို ထိခိုက်နစ်နာပါက “ဝ” ပြည်တရားစီရင်ရေးကော်မတီ – WSP အနေနဲ့ လုံးဝလစ်လျူရှုမှာမဟုတ်ဘဲ စီစစ်စုံစမ်းအရေးယူသွားမယ်လို့ ထပ်လောင်း ပြောကြားထားပါတယ်။
“ဝ” ပြည်သွေးစည်းညီညွတ်ရေးပါတီ/တပ်မတော် – UWSP/UWSA က ပြီးခဲ့တဲ့ဇွန်လ ၆ ရက်မှာ “ဝ” ပြည်တရားရေးကော်မတီ – WSP ရဲ့ ထိပ်တန်းတာဝန်ယူထားသူတွေကို အပြောင်းအလဲပြုလုပ်ခဲ့ပြီး “ရန်ဖျင်” ဆိုသူကို ရဲဌာနရဲ့ ပူးတွဲကြီးကြပ်စီမံခန့်ခွဲသူအဖြစ် ပြောင်းလဲ ခန့်အပ်ခဲ့ပါတယ်။
မနေ့ ဇွန်လ ၁၄ ရက်မှာတော့ “ဝ” ပြည်ရဲဌာန အပြောင်းအလဲ စတင်မြင်တွေ့လာရသလို လက်ရှိ ရဲဌာနရဲ့ ဒုအတွင်းရေးမှူးအသစ်ဖြစ်လာတဲ့ “ရန်ဖျင်” အကြောင်းကိုသိရှိဖို့ နီးစပ်သူတွေထံ ရွှေဖီမြေက စုံစမ်းမေးမြန်းထားဆဲဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
