သုတ၊ မေလ ၁၂ ရက်၊ လားရှိုး
စစ်ကောင်စီတပ် ထိန်းချုပ်ထားတဲ့ ရှမ်းမြောက် လားရှိုးမြို့ မှာ သူခိုးတွေ သောင်းကျန်းနေပြီး နေအိမ်ဖောက်ထွင်းခံရတာနဲ့ မီးကြိုးတွေ ခိုးယူခံနေရတယ်လို့ လားရှိုးမြို့ခံတွေက ရွှေဖီမြေကို ပြောပါတယ်။
သူခိုးတွေဟာ ညဘက် လူအိပ်ချိန် သန်းခေါင်ယံမှာ ခိုးယူ နေတာဖြစ်ပြီး ရပ်ကွက်အများစုမှာ မီးကြိုးတွေ ခိုးယူခံနေရသလို နေအိမ်ထဲအထိ အုပ်စုလိုက်ဖွဲ့ပြီး ကားခိုးယူတာတွေ မကြာခဏ ဖြစ်ပွားနေတယ်လို့ လားရှိုးမြို့ခံ အမျိုးသား တစ်ဦးက ရွှေဖီမြေကို ပြောပါတယ်။
“ဒီနေ့ မနက် ၂ နာရီမှာ ရပ်ကွက်- ၁ မှာ နေအိမ်ထဲအထိ ဖိုးဝီးကားတစ်စီး ဝင်ခိုးခံရတာ။ ကားတွေရော၊ မီးကြိုး၊ ဆိုင် ကယ်ရော ခိုးခံနေရတာ။ မနေ့ည တစ်ရက်တည်း ခိုးမှု ၄၊ ၅ မှုဖြစ်တယ်။ မီးပြန်လာတော့ မီးကြိုးပြင်ကြတော့ မီး ကြိုးအသစ်တွေ ခိုးကြတာ” လို့ ဆိုပါတယ်။
ဒါ့အပြင် လားရှိုးမြို့မှာ မူးယစ်ဆေးဝါး သုံးစွဲသူတွေ ပိုများ လာတာကြောင့် သူခိုးတွေ သောင်းကျန်းနေတာဖြစ်ပြီး စစ်ကောင်စီဘက်က ထိထိရောက်ရောက် အရေးယူနိုင်တာ မတွေ့ ရဘူးလို့ နောက်ထပ် လားရှိုးမြို့ခံတစ်ဦးက ပြောပါတယ်။
“သူခိုးတွေက အဖွဲ့လိုက်ခိုးတာ။ ဘယ်နေရာမှာ ဘာရှိတယ်ဆိုပြီး သတင်းအရင်လိုက်တာ။ ပြီးမှ လှုပ်ရှားတာ။ ကား ပျောက်ရင် ပြန်ရတာရှားတယ်။ မူးယစ်ဆေးဝါးဆိုလည်း စစ်နေတာပဲ။ ဘာမိလည်းတော့ မသိဘူး”
ဒါ့အပြင် လားရှိုးမြို့ကို စစ်ကောင်စီ ထိန်းချုပ်ပြီးနောက် ခိုးမှုတွေအပါအဝင် ဓားပြမှု၊ လုယက်မှုနဲ့ ပြန်ပေးဆွဲမှုတွေလည်း ခပ်စိပ်စိပ် ဖြစ်ပွားနေတယ်လို့ လားရှိုးမြို့ခံတွေက ဆိုကြပါတယ်။
ပြီးခဲ့တဲ့ ဧပြီ ၂၁ ရက်မှာလည်း အမျိုးသား ၂ ဦးက ကား ဝယ်မယ်လို့ဆိုကာ ကားပွဲစား အမျိုးသားကို သတ်ဖြတ်ပြီး ကားကို လုယူသွားကာ တရားခံကို စစ်ကောင်စီဘက်က ဖမ်းဆီးနိုင်တာ မရှိသေးပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
