ရွှေဖီမြေ၊ ဇွန်လ ၂၂ ရက်၊ ရွာငံ
ရှမ်းတောင် ရွာငံမြို့နယ်မှာ တော်လှန်ရေးတပ်ဖွဲ့နာမည်ကို အသုံးပြုပြီး ဓားပြတိုက်ခဲ့တဲ့ အမျိုးသားတစ်ဦးကို ဖမ်းဆီးရမိကြောင်း ဓနုဒေသအခြေစိုက် ပြည်သူ့ကာကွယ်ရေးတပ်မတော် – (၁၀၀၃) တပ်ရင်းက သတင်းထုတ်ပြန်ထားပါတယ်။
ရွာငံမြို့နယ်အတွင်း ဖြစ်ပွားခဲ့တဲ့ ဓားပြတိုက်မှုဖြစ်စဉ်တွေနဲ့ ပတ်သက်ပြီး (၁၀၀၃) တပ်ရင်းက စုံစမ်းစစ်ဆေးခဲ့ရာ ပြစ်မှုကျူးလွန်တဲ့အဖွဲ့ထဲက အမျိုးသားတစ်ဦးကို ဖမ်းဆီးရမိခဲ့ပြီး ၎င်းတို့ဟာ အွန်လိုင်းစလော့ဂိမ်းနဲ့ မူးယစ်ဆေးဝါးသုံးစွဲသူတွေ ဖြစ်ကြတယ်လို့ ဆိုပါတယ်။
အဆိုပါ ဖမ်းမိထားတဲ့ ဓားပြတိုက်အမျိုးသားတစ်ဦးရဲ့ဝန်ခံချက်ထဲမှာ ၎င်းတို့က စလော့ဂိမ်းဆော့ဖို့ ငွေကြေးလိုအပ်နေတာကြောင့် သေနတ်အတုတွေနဲ့ ဓားတွေကို အသုံးပြုပြီး ဓားပြတိုက်ခဲ့တာ ဖြစ်ပါတယ်။
လက်ရှိမှာတော့ ဓားပြတိုက်သူရဲ့ အဖွဲ့ခေါင်းဆောင်နဲ့ ကျန်ရှိနေတဲ့ အဖွဲ့ဝင်တွေက ထွက်ပြေးတိမ်းရှောင်နေဆဲ ဖြစ်တယ်လို့ ဆိုပါတယ်။
အဲဒီဓားပြတိုက်မှု ကျူးလွန်သူတွေဟာ တော်လှန်ရေးတပ်ဖွဲ့တွေရဲ့ နာမည်ကို အသုံးပြုပြီး တော်လှန်ရေးတပ်ဖွဲ့ အချင်းချင်း၊တော်လှန်ရေးတပ်ဖွဲ့နဲ့ ပြည်သူတို့အကြား ယုံကြည်မှု ကင်းမဲ့စေတဲ့ သတင်းအမှား ဖြန့်ဝေခဲ့တာ ဖြစ်တယ်လို့ ဆိုပါတယ်။
အခု ဖြစ်စဉ်မျိုး ပြည်သူတွေအပေါ် ဓားပြတိုက်မှု ကျူးလွန်လုပ်ဆောင်နေတာတွေဟာ အဓိက စလော့ဂိမ်းနဲ့ မူးယစ်ဆေးဝါးသုံးစွဲမှုကြောင့် ငွေကြေးလိုအပ်ချက်အရ လုပ်ဆောင်ခြင်းဖြစ်တာကို တွေ့ရပြီး ၎င်းဖြစ်စဉ်မျိုး ထပ်မံမဖြစ်ပွားစေဖို့ (၁၀၀၃)တပ်ရင်းအနေနဲ့ ဓနုဒေသအတွင်း စလော့ဂိမ်းကစားသူတွေနဲ့ မူးယစ်ဆေးဝါးသုံးစွဲရောင်းဝယ်နေသူတွေကို အရေးယူသွားမှာ ဖြစ်တယ်လို့ ထုတ်ပြန်ချက်ထဲမှာ ဖော်ပြထားပါတယ်။
ဒါ့အပြင် ပြည်သူ့ကာကွယ်ရေးရဲဘော်တွေ ကိုယ်တိုင်လည်း မူးယစ်ဆေးဝါးသုံးစွဲတာနဲ့ စလော့ဂိမ်းကစားတာတွေ တွေရှိခဲ့ရင် ထိရောက်တဲ့ အရေးယူမှုတွေ ခံယူရမယ်လို့လည်း သတိပေးပြောဆိုထားပါတယ်။
ဓနုဒေသအတွင်းရှိ မိဘပြည်သူတွေအနေနဲ့လည်း အသက်မပြည့်သေးတဲ့ ကလေးတွေကို လောင်းကစားမှုနဲ့ မူးယစ်ဆေးဝါးမှုတွေ ပါဝင်ပတ်သက်မှု မရှိစေရန် ကြပ်မတ်စောင့်ကြည့်ပေးပြီး ပတ်ဝန်းကျင်မှာလည်း အွန်လိုင်းစလော့ဂိမ်းဆော့နေသူတွေနဲ့ မူးယစ်ဆေးသုံးစွဲရောင်းဝယ်နေသူတွေကို တွေ့ရှိ ၊သိရှိရင် တိုင်ကြားဖို့လည်း ဓနုတပ် (၁၀၀၃) တပ်ရင်းက တိုက်တွန်းထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
