ရွှေဖီမြေ၊ မတ်လ ၂၅ ရက်၊ နမ့်ဆန်
တအာင်းဒေသ နမ့်ဆန်မြို့နယ်မှာ ရွှေဖီဦး လက်ဖက်ရွက်စိမ်း တစ်ပိသာကို ကျပ် ၄၀၀၀ ကစပြီး ဈေးရနေကြောင်း မြို့ခံတွေရဲ့ ပြောပြချက်အရ သိရပါတယ်။
မတ်လ ဒုတိယအပတ်ကစပြီး နမ့်ဆန်မြို့နယ် မြို့သစ်၊ ကွမ်ဟယ်နဲ့ လွယ်ခမ်း စတဲ့ ကျေးရွာအပြင် မြို့ပေါ်မှာပါ ရွှေဖီမိုးလွတ် လက်ဖက်ရွက်စိမ်း ၁ ပိသာကို ၄၀၀၀ ကျပ်ကစပြီး ပေးဝယ်နေကြတာ ဖြစ်ပါတယ်။
ကွမ်ဟယ်ရွာမှ အမျိုးသားတစ်ဦးက “ဒီက စက်ရုံတွေက အမျိုးအစားပေါ်ခွဲပြီး ဈေးက ခွဲပေးတာ။ ၄၀၀၀ ကစပြီး ပေးဝယ်တာဖြစ်တယ်” လို့ ပြောပါတယ်။
အလားတူ မြို့သစ်ကျေးရွာအုပ်စုမှာလည်း လက်ဖက်ရွက်စိမ်း တစ်ပိဿာ ၄၀၀၀ ဝန်းကျင်နဲ့ စပြီး ပေးဝယ်နေတယ်လို့ ရွာခံ အမျိုးသားတစ်ဦးက ပြောပါတယ်။
ငွန်ဆိုင်းမှာ ရွက်စိမ်းစျေး Green Tea ထုတ်တဲ့ G_1 အဆင့်က ၅၀၀၀ ကျပ်၊ G_2 က ၄၅၀၀နဲ့ G_3 က ၄၀၀၀ ကျပ် အဆင့်ဆင့်ခွဲပြီး ပေးဝယ်နေသလို လွယ်ခမ်း နဂါးပျံ အချိုခြောက်စက်ရုံမှာလည်း ၄၅၀၀၊ ၄၂၀၀ ကျပ်နဲ့ စတင်ဝယ်ယူနေတာ ဖြစ်တယ်လို့ နမ့်ဆန်ရှိ ပလောင်လက်ဖက် စိုက်ပျိုးထုတ်လုပ်ရောင်းချသူများအသင်းရဲ့ ပြောပြချက်အရ သိရပါတယ်။
အခုနှစ် လက်ဖက်ဈေး တစ်ပိသာဟာ ၄၀၀၀ ဝန်းကျင်ရပေမဲ့ တစ်ဟုန်ထိုး တက်နေတဲ့ ကုန်ဈေးနှုန်းနဲ့ နှိုင်းယှဉ်ပါက အခြေခံအစားအသောက်အတွက်တောင် မလောက်ငှတာကြောင့် အခက်ကြုံနေရဆဲ ဖြစ်ကြောင်း လက်ဖက်တောင်သူတွေက ဆိုပါတယ်။
အလားတူ ကျောက်မဲမြို့နယ်က တချို့ကျေးရွာမှာ လက်ဖက်ရွက်စိမ်း တစ်ပိသာ ၃၀၀၀ ကျပ် ဝန်းကျင်သာရပြီး မန်တုံမြို့နယ်မှာလည်း တစ်ပိသာကို ၂၀၀၀ ကျပ် နီးပါးသာ ဈေးရနေကြောင်း ဒေသခံတွေရဲ့ ပြောပြချက်အရ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
