မိုင်းရူပ၊ ဇွန်လ ၂၂ ရက်၊ မြင်းခြံ
မန္တလေးတိုင်း မြင်းခြံခရိုင်အတွင်းရှိ ပြည်သူ့လွတ်မြောက်ရေးတပ်မတော်- PLA ရဲ့ တပ်စခန်းတွေကို ဆုတ်ခွာပေးဖို့ အမျိုးသားညီညွတ်ရေးအစိုးရ- NUG လက်အောက်ခံတပ်တွေက ဖိအားပေးနေတယ်လို့ PLA က ဒီနေ့ ဇွန်လ ၂၂ ရက်မှာ ထုတ်ပြန်ပါတယ်။
မနေ့ ဇွန်လ ၂၁ ရက်မှာ အင်အား ၅၀၀ ဝန်းကျင်ရှိတဲ့ NUG ရဲ့ မြင်းခြံခရိုင်ကွပ်ကဲရေးအဖွဲ့က တောင်သာမြို့နယ်အတွင်းရှိ PLA တပ်စခန်းတွေကို ဝိုင်းဝန်းပိတ်ဆို့ပြီး တားဆီးရာကနေ တင်းမာမှုဖြစ်ပွားခဲ့တာလို့ ဆိုပါတယ်။
ဒီနေ့ ဇွန်လ ၂၂ ရက်မှာလည်း မြင်းခြံခရိုင်အတွင်းရှိ ကျေးရွာ ၂ ခုမှာ PLA ရဲ့ တပ်စခန်းကို NUG ဘက်က ဝင်ရောက်စီးနင်းခဲ့ပြီး PLA ရဲဘော်ရဲ့ အစ်မဖြစ်သူကို ဖမ်းဆီးခေါ်ဆောင်သွားတယ်လို့ ထုတ်ပြန်ချက်ထဲ ဖော်ပြထားပါတယ်။
ဒါ့အပြင် ဒီနေ့ မနက်ပိုင်းမှာ NUG ရဲ့ မြင်းခြံခရိုင်ကွပ်ကဲရေးတာဝန်ခံက PLA အနေနဲ့ ဖမ်းဆီးရမိတဲ့ ဒလန်တွေကို သက်သေခံပစ္စည်းတွေနဲ့ အပ်နှံဖို့နဲ့ PLA တပ်အနေနဲ့ မြင်းခြံခရိုင်ကနေ တပ်တွေ ဆုတ်ခွာပေးဖို့ ပြောဆိုလာတယ်လို့ ဆိုပါတယ်။
PLA ရဲ့ ပြောရေးဆိုခွင့်ရှိသူ ကိုဝေယံဖြိုးမိုးက “လောလောဆယ်တော့ ထိပ်တိုက်မှုမဖြစ်အောင် ကျနော်တို့ရဲဘော်တွေက ရှောင်တိမ်းပေးနေတဲ့ အခြေအနေမျိုးရှိတယ်။ ကျနော်တို့ လက်တွဲတဲ့ မဟာမိတ်ခေါင်းဆောင်တွေကို ခေါ်တွေ့ပြီးတော့ ဘယ်ဘက်ကပါမလဲဆိုပြီး ဖိအားပေးနေတာရှိတယ်” လို့ ရွှေဖီမြေကို ပြောပါတယ်။
PLA အနေနဲ့ NUG ရဲ့ ယန္တရားတွေမှာ ပူးပေါင်းမှုတွေရှိနေပြီး မြင်းခြံခရိုင်ကနေ တပ်တွေဆုတ်ခွာဖို့ ဖိအားပေးတာဟာ လက်ခံနိုင်ဖွယ်မရှိဘူးလို့ PLA က ထုတ်ပြန်ထားပါတယ်။
NUG တပ်ဘက်ကတော့ မြင်းခြံခရိုင်မှာ တော်လှန်ရေးတပ်အချင်းချင်း ဖြစ်ပွားနေတဲ့ စစ်ရေးတင်းမာမှုနဲ့ ပတ်သက်ပြီး တစုံတရာ သတင်းထုတ်ပြန်ထားတာ မရှိသေးပါဘူး။
ပြီးခဲ့တဲ့ မေလ ၂၆ ရက်မှာလည်း နွေဦးတော်လှန်ရေးမဟာမိတ်တပ်ပေါင်းစု- SRA ရဲ့ အဖွဲ့ဝင်ဖြစ်တဲ့ စစ်ကိုင်းတိုင်း မင်းကင်းအခြေစိုက် ကျောင်းသားလက်ရုံးတော်လှန်ရေးတပ်တော်- SRF ရဲ့ ခေါင်းဆောင်ကို NUG က ဖမ်းဆီးခဲ့တဲ့ ဖြစ်စဉ်တွေလည်း ရှိခဲ့ပါတယ်။
ဒါ့အပြင် ဇွန်လ ၁၆ ရက်မှာလည်း စစ်ကိုင်း PDF ခေါင်းဆောင် ကိုစစ်ငြိမ်းနိုင်ကို NUG က ဖမ်းဆီးထားပြီး ဒီနေ့အချိန်အထိ မိသားစုနဲ့ အဆက်အသွယ် မရသေးပါဘူး။
NUG ရဲ့ ကွပ်ကဲမှုအောက်မရှိတဲ့ တော်လှန်ရေးတပ်ဖွဲ့တွေကို အခုလို ဖမ်းဆီးမှုတွေ ပြုလုပ်နေတဲ့အပေါ် တော်လှန်အင်အားစုတွေဘက်က ဝေဖန်မှုတွေရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
