ရွှေဖီမြေ၊ မေလ ၅ ရက်
ပြည်သူ့ကာကွယ်ရေးတပ်မတော်- PDF ဖွဲ့စည်းတည်ထောင်မှု ၅ နှစ်ပြည့်တဲ့နေ့မှာ အမျိုးသားညီညွတ်ရေးအစိုးရ- NUG ရဲ့ ပြည်ထောင်စုဝန်ကြီးချုပ် မန်းဝင်းခိုင်သန်းက တော်လှန်ရေးဟာ ခဏလေးနဲ့ပြီးသွားမယ့်အရာ မဟုတ်ဘဲ ခရီးရှည်တစ်ခုဖြစ်လို့ ဇွဲမလျှော့ဘဲ ဆက်လက်ရှေ့ဆက်ဖို့ လိုတယ်လို့ ပြောပါတယ်။
PDF က ဒီ ၅ နှစ်အတွင်း စနစ်တကျ ဖွဲ့စည်းထားတဲ့ တပ်တစ်ခု ဖြစ်လာပြီး စစ်ရေးအောင်မြင်မှုတွေလည်း ရရှိထားတယ်လို့ ဆိုပါတယ်။
တချို့နေရာမှာတော့ ပြည်သူတွေကို ကာကွယ်ဖို့အတွက် နည်းဗျူဟာအရ ဆုတ်ခွာရတာ ရှိခဲ့တယ်လို့လည်း ရှင်းပြပါတယ်။
တော်လှန်ရေးဟာ အပြေးပြိုင်ပွဲ မဟုတ်ဘဲ ပန်းတိုင်မရောက်မချင်း လျှောက်ရမယ့် ခရီးရှည်တစ်ခု ဖြစ်သလို ပင်ပန်းလာရင် ခဏနား၊ အားပြန်ဖြည့်ပြီး ဆက်လက် လျှောက်ကြဖို့ကိုလည်း တိုက်တွန်းထားပါတယ်။
ဒါ့အပြင် ရန်သူဘက်က သတင်းမှားတွေ၊ ဝါဒဖြန့်မှုတွေနဲ့ စိတ်ဓာတ်ကျအောင် ကြိုးစားနေကြတာကို သတိထားဖို့လည်း ပြောပါတယ်။
လက်နက်ထက် စည်းကမ်းနဲ့ ကျင့်ဝတ်က ပိုအရေးကြီးတယ်လို့ ထောက်ပြထားပြီး လူထုကို လေးစားကာ လူ့အခွင့်အရေးတွေကို ထိန်းသိမ်းဖို့လည်း တိုက်တွန်းခဲ့ပါတယ်။
နောက်ဆုံးမှာတော့ တော်လှန်ရေး အောင်မြင်မှုတွေဟာ မဟာမိတ်အဖွဲ့၊ လူထုတွေရဲ့ ပံ့ပိုးမှုကြောင့် ဖြစ်တယ်လို့ ပြောဆိုပြီး ဖက်ဒရယ်ဒီမိုကရေစီ ပြည်ထောင်စု တည်ဆောက်နိုင်မယ်လို့ ယုံကြည်ကြောင်း ပြောကြားခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
