မိုင်းရူပ၊ မေလ ၅ ရက်၊ မိုးမိတ်
ရှမ်းမြောက် မိုးမိတ်မြို့ထဲ စစ်ကောင်စီတပ်က စစ်အင်အား ဖြည့်တင်းပြီးနောက် ကချင်တပ်မတော်- KIA ထိန်းချုပ်ထားတဲ့ မဘိမ်းမြို့နယ်ဘက် ထိုးစစ်ဆင်လာနိုင်တာကြောင့် ဒေသခံတချို့ ထွက်ပြေးတိမ်းရှောင်နေကြပါတယ်။
ပြီးခဲ့တဲ့ ဧပြီလကုန်မှာ စစ်တပ်ဘက်က မိုးကုတ်ကနေ မိုးမိတ်မြို့ထဲ စစ်ကား ၁၂ စီးနဲ့ စစ်အင်အား ဖြည့်တင်းခဲ့ပြီးနောက် KIA ဘက်ကလည်း ဒေသခံတွေကို တိမ်းရှောင်ကြဖို့ သတိပေးထားတယ်လို့ ဆိုပါတယ်။
“စစ်ကား ၁၂ စီး လူအပြည့်နဲ့ မိုးကုတ်ဘက်ကနေ မိုးမိတ်ကို ရောက်လာတာ။ မဘိမ်းဘက်ကို ထိုးမယ်လို့ သတင်းထွက်နေတာ။ KIA က သတိပေးထားတာ ကြားတယ်။ အခု မဘိမ်းရွာဘက်က စစ်ရှောင်နေကြပြီ” လို့ မိုးမိတ်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
စစ်တပ်က ရှမ်းမြောက်-ကချင်နယ်စပ်မှာရှိတဲ့ မဘိမ်းမြို့ကို ပြန်ရဖို့ မိုးမိတ်-မြစ်ဆုံ လမ်းပိုင်းကနေတဆင့် ထိုးစစ်ဆင်လာနိုင်တယ်လို့ သုံးသပ်မှု ရှိနေပါတယ်။
မဘိမ်းမြို့ကို ပြီးခဲ့တဲ့ ၂၀၂၄ ခုနှစ် ဇန်နဝါရီ ၂၁ ရက်မှာ KIA နဲ့ ပူးပေါင်းတပ်တွေဘက်က တိုက်ခိုက်သိမ်းပိုက်ခဲ့တာပဲ ဖြစ်ပါတယ်။
စစ်တပ်ဟာ မိုးကုတ်နဲ့မိုးမိတ်မြို့ကို တရုတ်နိုင်ငံရဲ့ အကူအညီနဲ့ တအာင်းတပ်ဆီကနေ ပြန်ရပြီးနောက် မြို့ပြင်နေရာနဲ့ စစ်ရေးအရ အရေးပါတဲ့ လမ်းကြောင်းတွေကို ဆက်တိုက် ထိုးစစ်ဆင်တိုက်ခိုက်နေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
