ပပ၊ ဇွန်လ ၁၃ ရက်၊ လောက်ကိုင်
ကိုးကန့်တပ် MNDAA ထိန်းချုပ်ထားတဲ့ ရှမ်းမြောက် လောက်ကိုင်မြို့မှာ ပြစ်မှုကျူးလွန်သူ အမျိုးသား ၇ ဦးထဲမှာမှ ၄ ဦးကို သေဒဏ်ပေးခဲ့ပြီး ကျန် ၃ ဦးကိုတော့ ထောင်ဒဏ် တစ်သက်တစ်ကျွန်း ချမှတ်ခဲ့ကြောင်း တုံချိန်မှာနေထိုင်တဲ့ အမျိုးသမီးရဲ့ ပြောပြချက်အရ သိရပါတယ်။
ဒီနေ့မနက် ၇ နာရီ ဝန်းကျင်မှာ လောက်ကိုင်မြို့ တုံချိန်မှာ အမှုစီရင်ခဲ့တာဖြစ်ပါတယ်။
၎င်းဖြစ်စဉ်ကိုမြင်တွေ့ခဲ့ရသူအမျိုးသမီးက “မနက်အစောကြီး ကားတန်းတွေသွားတာတွေ့တယ် မေးကြည့်တော့ သေဒဏ်ပေးဖို့သွားတာတဲ့။ ခဏကြာတော့ သေနတ်သံကြားရတယ် ” လို့ ပြောပါတယ်။
၎င်း ၇ ဦးဟာ လူသတ်မှု၊ မုဒိမ်းမှု၊ ဓါးပြတိုက်မှု စတဲ့အမှုတွေကို ကျူးလွန်ခဲ့တာဖြစ်ပြီး လူသတ်မှုနဲ့ မုဒိမ်းမှုကျူးလွန်သူတွေကိုတော့ သေဒဏ်ပေးခဲ့ပြီးတော့ ဓါးပြတိုက်မှုကျူးလွန်သူတွေကို ထောင်ဒဏ် တစ်သက်တစ်ကျွန်းချမှတ်လိုက်တယ်လို့ ဆိုပါတယ်။
အလားတူ ပြီးခဲ့တဲ့ မေလ ၉ ရက်ကလည်း MNDAA ထိန်းချုပ်တဲ့ သိန္နီမှာ ခိုးမှုနဲ့ မူးယစ်ဆေး ရောင်းသူ အမျိုးသမီးအပါအဝင် ၅ ဦးကို MNDAA က မြို့ထဲ လှည့်ပတ်ပြသခဲ့ပါတယ်။
ဒါ့အပြင် ၂၀၂၅ ခုနှစ် စက်တင်ဘာလကလည်း ရာဇဝတ်မှု ကျူးလွန်သူ ၇ ဦး ထဲမှာမှ ၃ ဦးကို MNDAA က လောက်ကိုင်မှာ သေဒဏ်ပေးခဲ့ပါတယ်။
၂၀၂၄ ခုနှစ် နှစ်ကုန်ကလည်း လောက်ကိုင်မှာ MNDAA က ရာဇဝတ်မှုကျူးလွန်တဲ့ အမျိုးသား ၆ ဦးကို လူထုရှေ့မှာ သေဒဏ်ပေးခဲ့ဖူးပါတယ်။
ကိုးကန့်တပ်က ပြစ်မှုကျူးလွန်တဲ့ တရားခံတွေကို လူရှေ့မှာ သေဒဏ်စီရင်တာနဲ့ အမိန့်ချမှတ်တာတွေ မကြာခဏပြုလုပ်လေ့ရှိပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
