ဝတ်ရည်၊ ဇွန်လ ၂၆ ရက်၊ နတ်မောက်
မကွေးတိုင်း နတ်မောက်မြို့နယ်မှာ စစ်ကောင်စီတပ်ရဲ့ လေကြောင်း တိုက်ခိုက်မှုကြောင့် မိသားစုဝင် ၃ ဦးအပါအဝင် ဒေသခံ ၅ ဦး သေဆုံးခဲ့တယ်လို့ နတ်မောက်မြို့နယ် ပြည်သူ့ကာကွယ်ရေးအဖွဲ့ (ပကဖ)က ထုတ်ပြန်ထားပါတယ်။
မနေ့ ဇွန်လ ၂၅ ရက် ညနေ ၄ နာရီခွဲမှာ နတ်မောက်မြို့နယ် သမုန်းကုန်းရွာကို ဂျက်ဖိုက်တာ ၂ စီးနဲ့ ပေါင် ၅၀၀ ဗုံး ၄ လုံး ကြဲချတိုက်ခိုက်ခဲ့တာပဲ ဖြစ်ပါတယ်။
“ကျေးရွာက နေအိမ် ၁ အိမ်ပေါ်ကို ဗုံး ကျတာ။ မိသားစု ၃ ယောက်နဲ့ အခြားရွာခံ ၂ ယောက် ပွဲချင်းသေဆုံးတာ။ နောက်ထပ် ၃ ယောက်က ဒဏ်ရာ ပြင်းထန်တယ်။ ဗုံးလည်း ကြဲတယ်။ စစ်သေနတ်တွေနဲ့လည်း ရွာထဲ ရမ်းပစ်သွားတယ်။ တိုက်ပွဲ ဖြစ်ပွားတာ မရှိပါဘူးဗျာ” ဆိုပြီး ဒေသခံ အမျိုးသားတစ်ဦးက ရွှေဖီမြေသို့ ပြောပါတယ်။
လေကြောင်း တိုက်ခိုက်မှုကြောင့် တစ်အိမ်တည်းနေ အသက် ၃၃ နှစ် မိခင်ဖြစ်သူ ဒေါ်သန်းသန်းမော်၊ ၁၂ နှစ်အရွယ် သားကြီးဖြစ်သူ မောင်အောင်ဘုန်းခန့်၊ ၈ နှစ်အရွယ် သားငယ်ဖြစ်သူ မောင်ညီဘုန်းခန့်၊ ရွာခံဖြစ်သူ ကိုချစ်ဦးနဲ့ ဒေါ်ရီတို့ သေဆုံးခဲ့ပါတယ်။
ဒေသခံတွေအနေနဲ့ စစ်တပ်ရဲ့ လေကြောင်းရန်ကို အထူးဂရုစိုက်ကြဖို့၊ စစ်ရေးသတိရှိရှိ နေထိုင်ကြဖို့ကိုလည်း နတ်မောက် ပကဖက တိုက်တွန်းထားပါတယ်။
စစ်တပ်က ၎င်းတို့ လက်လွှတ်ခဲ့ရတဲ့ နေရာတွေကို ပြန်ရနိုင်ဖို့ မြေပြင်ထိုးစစ်တွေ လုပ်ဆောင်နေသလို လက်နက်ကြီးနဲ့ လေကြောင်း ဗုံးကြဲတိုက်ခိုက်မှုကိုလည်း ဆက်တိုက် လုပ်ဆောင်တာကြောင့် ဒေသခံ ထိခိုက်သေဆုံးမှုလည်း ဆက်ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
