ရွှေဖီမြေ၊ မေလ ၇ ရက်၊ လားရှိုး
စစ်ကောင်စီတပ် ထိန်းချုပ်ထားတဲ့ ရှမ်းမြောက် လားရှိုးမြို့မှာ မီးကြိုးသူခိုးတွေ သောင်းကျန်းနေပြီး မီးကြိုးတွေ နေ့စဥ်လိုလို ခိုးယူခံနေရတယ်လို့ ဒေသခံတွေက ပြောပါတယ်။
ပြီးခဲ့တဲ့ မေလ ၃ ရက်နေ့က လားရှိုးမြို့ ရပ်ကွက်(၁)ထဲမှာ မီးကြိုးခိုးယူခံနေရပြီး ရပ်ကွက် (၁၀)၊ ရပ်ကွက် (၁၁)၊ ရပ်ကွက်(၇) နဲ့ ရပ်ကွက်(၄) တွေမှာလည်း ခိုးယူခံနေရတယ် ဒေသခံတစ်ဦးက ပြောပါတယ်။
“မီးကြိုးလည်း နေ့တိုင်းပျောက်။ တက်ခိုးကြတာ။ ရပ်ကွက်တိုင်းလိုလို ပတ်ခိုးနေတာပဲ။ ဘိန်းစားတွေ ပတ်ခိုးနေတာ။ ဒီနှစ်ရက် သုံးရက်ပဲရှိသေးတယ် ခိုးသွားတာ။ ကျန်တဲ့ဟာကို မနေ့က လာခိုးတယ်”
မီးကြိုးလိုက်ခိုးနေသူ အများစုဟာ မူးယစ်ဆေးဝါးသုံးစွဲသူတွေဖြစ်ပြီး နေ့ခင်းဘက်တွေမှာပါ လိုက်ခိုးနေကြတာလို့ ဒေသခံတွေက ပြောပါတယ်။
“တချို့ ရပ်ကွက်က မီးမလာ။ မီးမလာဘူးဆို ခိုးပြီကော။ ရပ်ကွက် ၁၀၊ ရပ်ကွက် ၁၁ ပိုခိုးခံရတယ်” လို့ နောက်ထပ် ဒေသခံတစ်ဦးက ပြောပါတယ်။
လားရှိုးမြို့ကို စစ်တပ် ပြန်ထိန်းချုပ်ပြီးနောက် ခိုးမှု၊ဓားပြတိုက်မှု၊ ပြန်ပေးဆွဲမှုနဲ့ လုယက်တာတွေ မကြာခဏ ဖြစ်ပွားနေပေမဲ့ စစ်တပ်ဘက်က ဖမ်းဆီးအရေးယူနိုင်တာ မရှိပါဘူး။
ပြီးခဲ့တဲ့ မေလ ၄ ရက်မှာလည်း ရပ်ကွက်(၇)၊ နယ်မြေ(၆)မှာ ဟိုက်ဂျက်ကားတစ်စီး ထပ်မံ ခိုးယူခံခဲ့ရတယ်လို့ ဖြစ်စဉ်သိရှိသူ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
အလားတူ ပြီးခဲ့တဲ့ မေလ ၃ ရက်မှာလည်း လားရှိုးမြို့ ရပ်ကွက်(၁) ပါရမီလမ်းသွယ် (၆)အနီးမှာ ဆိုင်ကယ် စီးလာတဲ့ အမျိုးသမီးတစ်ဦးကို အသက် ၂၀ ကျော်အရွယ် အမျိုးသား ၄ ဦးက ဓားထောက်ပြီး ဆိုင်ကယ်နဲ့ ငွေ သိန်း ၁၀၀ လုယူသွားတဲ့ဖြစ်စဉ် ဖြစ်ပွားခဲ့ပါတယ်။
ဒါ့အပြင် ပြီးခဲ့တဲ့ ဧပြီ ၂၁ ရက်မှာလည်း အမျိုးသား ၂ ဦးက ကားဝယ်မယ်လို့ဆိုကာ ကားပွဲစား အမျိုးသားကို သတ်ဖြတ်ပြီး ကားကို လုယူသွားကာ တရားခံတွေကို စစ်ကောင်စီဘက်က ဖမ်းဆီးနိုင်တာ မရှိသေးပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
