ပို့လဘား၊ ဇူလိုင် ၁၃ ရက်၊ နမ့်ခမ်း
တရုတ်ပြည်ဘက်ရှိ လောင်းကျန်းရေကာတာကို တရုတ်ဘက်က ရေဖွင့်ချမှုကြောင့် နမ့်ခမ်းမြို့ရှိ ရွှေလီမြစ်ဟာ တဖြည်းဖြည်းနဲ့ ရေမြင့်တက်လာကြောင်း ဒေသခံတွေဆီက သိရပါတယ်။
တရုတ်ရဲ့ ရေကာတာဖွင့်ချမှုကြောင့် နမ့်ခမ်းမြို့ ဟိုဆိုင်းရပ်ကွက်ရှိ ရေချောင်းနဲ့ ရွှေလီမြစ်က တဖြည်းဖြည်းနဲ့ ရေမြင့်တက်လာပြီး အဲဒီအနီးအနားမှာ နေထိုင်ကြတဲ့ ဒေသခံတွေ အရေးပေါ် ကြိုတင်ရှောင်ပေးဖို့ တအာင်းတပ် TNLA ဘက်က သတိပေးပြောဆိုထားပါတယ်။
ဒေသခံအမျိုးသားတစ်ဦးက ” နေ့လယ်တုန်းက ရွှေလီမြစ်ဘက်သွားတာ ရေကတော့ အရင်ရက်ထက် ကြီးတယ်။ နစ်မြှုပ်တဲ့အိမ်တွေက မြစ်အနီးမှာရှိတဲ့အိမ်တွေပဲ။ အဲမြစ်အနီးမှာရှိတဲ့ အိမ်တွေကလည်း လူနေတာသိပ်မရှိဘူး။ အဲမှာက လှေပိုင်ရှင်လောက်ပဲနေကြတာ”
ပြီးခဲ့တဲ့ ဇူလိုင်လ ၈ ရက် ည ၆ နာရီခွဲမှာ ရေစီးနှုန်း (၅၀၀ – ၁၂၀၀) ပမာဏရှိတဲ့ ရေကာတာကို တရုတ်ဘက်က ရေဖွင့်ချခဲ့တာကြောင့် ရေကာတာရဲ့ ရေဟာ နမ့်ခမ်းမြို့ ရွှေလီမြစ်ဘက် ရောက်ရှိလာနိုင်တဲ့ အခြေအနေရှိတယ်လို့လည်း တရုတ်ဘက်က စာထုတ်ပြန်ထားပါတယ်။
ဒါ့အပြင် တအာင်းသဘာဝပတ်ဝန်းကျင် စောင့်ကြည့်ရေးအဖွဲ့ – TEWG ဘက်ကလည်း တရုတ် – မြန်မာနယ်စပ်နဲ့ မနီးမဝေးမှာရှိတဲ့ Longchuan Jiang မြစ်ဟာ အရှေ့ဘက်ကနေ အနောက်ဘက်ကို စီးဆင်းပြီးတော့ မြန်မာနိုင်ငံအတွင်းမှာရှိတဲ့ ရွှေလီမြစ်ရဲ့ မြစ်လက်တက်ဖြစ်ပြီး အဲဒီမြစ်တလျှောက်မှာ ရေကာတာပုံစံနဲ့ အများအပြားတွေ့ရှိရတာကြောင့် ရွှေလီမြစ်ကမ်းအနီးနဲ့ နမ့်ခမ်းမြို့က ဒေသခံတွေဟာ ရေကြီးရေလျှံမှုကို အမြဲသတိပြုစောင့်ကြည့်လေ့လာပေးဖို့ အသိပေးပြောဆိုထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
