သုတ၊ မေလ ၁၄ ရက်၊ မူဆယ်
ရှမ်းမြောက် မူဆယ်မြို့ရှိ အထည်ချုပ်စက်ရုံမှာ အလုပ်ရမယ်ဆိုပြီး တက်လာတဲ့ အသက် ၁၇ နှစ်အရွယ် အမျိုးသမီးငယ်တစ်ဦးနဲ့ မိသားစုဝင်က အဆက်အသွယ် မရတော့ဘဲ ပျောက်ဆုံးနေတယ်လို့ လိုက်ပါကူညီပေးတဲ့ လူမှုကူညီရေးအသင်းဆီက သိရပါတယ်။
အသက် ၁၇ နှစ်အရွယ် မခင်သီတာဆန်းဆိုသူဟာ ရန်ကုန်မြို့ရှိ အထည်ချုပ်စက်ရုံမှာ အလုပ်လုပ်ရာကနေ တရုတ်-မြန်မာနယ်စပ် မူဆယ်မြို့ရှိ အထည်ချုပ်စက်ရုံမှာ လစာ ကောင်းကောင်းနဲ့ အလုပ်ရမယ်ဆိုပြီး မေလ ဒုတိယအပတ်ထဲ မူဆယ်မြို့ဘက် ရောက်ရှိလာတာ ဖြစ်ပါတယ်။
မူဆယ်မြို့ရှိ လူမှုကူညီရေးအသင်းရဲ့ တာဝန်ရှိသူတစ်ဦးက “ကလေးမလေးက ရန်ကုန် အထည်ချုပ်စက်ရုံမှာ အလုပ်လုပ်တာ။ ၅ ရက်နေ့က လစာ ထုတ်ပြီး သူ့အမေကို ပေးတာ။ မူဆယ်ရောက်မှ သူ့အမေဆီ မူဆယ် ရောက်ကြောင်း ပြောတာ။ မူဆယ်မှာ တစ်လ ၁၀ သိန်း ရမယ်ပေါ့။ အဲဒီနောက်ပိုင်း အဆက်အသွယ် ပြတ်သွားတယ်” လို့ ရွှေဖီမြေကို ပြောပါတယ်။
မခင်သီတာဆန်းဟာ ဧရာဝတီတိုင်း လပတ္တာမြို့နယ်မှာ နေထိုင်သူဖြစ်ပြီး ၎င်းကို တွေ့ရှိတဲ့သူတွေအနေနဲ့ မိသားစုရဲ့ ဖုန်းနံပါတ် 09-424 070 251 ကို ဆက်သွယ်ပေးဖို့ တောင်းဆိုထားပါတယ်။
မူဆယ်မြို့မှာ အလုပ်ရမယ်ဆိုပြီး လိမ်လည်ခံရတဲ့ ဖြစ်စဉ်တွေ မကြာခဏ ဖြစ်ပွားနေတာကြောင့် အလွယ်တကူ မယုံကြည်ကြဖို့ လူမှုကူညီရေးအသင်းတွေက တိုက်တွန်းသတိပေးထားကြပါတယ်။
ပြီးခဲ့တဲ့ ဧပြီလကုန်မှာလည်း မူဆယ်မြို့မှာ အလုပ်ရမယ်ဆိုပြီး ရှမ်းတောင် မိုင်းကိုင်မြို့နယ်က တအာင်းလူမျိုး အမျိုးသမီးတစ်ဦး တရုတ်မယားအဖြစ် စေခိုင်းခံရရာကနေ လွတ်မြောက်လာခဲ့ပြီး လူမှုကူညီရေးအသင်းတွေရဲ့ အကူအညီနဲ့ နေရပ်သို့ ပြန်နိုင်ခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
