သုတ၊ မေလ ၁၇ ရက်၊ မူဆယ်
ရှမ်းမြောက် တရုတ်-မြန်မာနယ်စပ် မူဆယ်မြို့မှာ အလုပ်ရမယ်ဆိုပြီး ရန်ကုန်ကနေ တက်လာတဲ့ အသက် ၁၇ နှစ်အရွယ် မခင်သီတာစန်းဟာ မူဆယ်မြို့ရှိ အခန်းတစ်ခုမှာ ထိန်းသိမ်းထားခံရတယ်လို့ မိသားစုဝင်နဲ့ နီးစပ်သူတစ်ဦးက ရွှေဖီမြေကို ပြောပါတယ်။
မနေ့ မေလ ၁၆ ရက်မှာ မခင်သီတာစန်းကို ၎င်းရဲ့မိခင်ဖြစ်သူနဲ့ Viber ကနေတဆင့် ဖုန်းဆက်သွယ်ခွင့်ပေးပြီး ဘယ်နေရာမှာ ရှိနေကြောင်းနဲ့ ဘာအလုပ်လုပ်ကိုင်ကြောင်း ပြောဆိုတာ မရှိတာကြောင်း မခင်သီတာစန်းရဲ့ မိသားစုဝင်တစ်ဦးက ရွှေဖီမြေကို ပြောပါတယ်။
“သမီးဖုန်းကိုခေါ်တာ ဖုန်းတော့ကိုင်တယ်။ ဘာမှ မပြောလာဘူး။ နောက်တော့ ဖုန်းချပြီး Viber ကနေတဆင့် ကျမကို ပြောလာတယ်။ သမီး အဆင်ပြေကြောင်း ပြောတာပေါ့။ ဘာအလုပ်လုပ်နေလဲ မေးတော့ စက်ရုံ ဆင်းတယ်ပဲ ပြောတယ်။ ဘာစက်ရုံလဲ မေးတော့ မဖြေဘူး။ နောက်တော့ ကျမဖုန်းကို Block သွားတယ်” လို့ မိသားစုနဲ့ နီးစပ်သူတစ်ဦးက ရွှေဖီမြေကို ပြောပါတယ်။
မခင်သီတာစန်းဟာ မူဆယ်မြို့ကို ရောက်လာတာ ရက်ပိုင်းပဲ ရှိသေးပေမဲ့ မိခင်ဖြစ်သူကို ငွေ လွှဲပေးရမယ်လို့ ပြောဆိုနေတာကြောင့် လူကုန်ကူးခံရမှာကို စိုးရိမ်နေရတယ်လို့ ၎င်းက ဆက်ပြောပြပါတယ်။
မခင်သီတာစန်းဟာ ရန်ကုန်မြို့ရှိ အထည်ချုပ်စက်ရုံမှာ အလုပ်လုပ်ကိုင်ခဲ့သူဖြစ်ပြီး ပြီးခဲ့တဲ့ မေလ ၅ ရက်မှာ မန္တလေးမြို့ရှိ အမျိုးသမီးတစ်ဦးက မူဆယ်မြို့ရှိ အထည်ချုပ်စက်ရုံမှာ လစာ ကောင်းတယ်ဆိုပြီး ခေါ်ဆောင်သွားခဲ့တာ ဖြစ်ပြီးတော့ လက်ရှိ အခန်းတစ်ခုထဲ ပိတ်လှောင်ခံနေရတယ်လို့ ဆိုပါတယ်။
မခင်သီတာစန်းဟာ ဧရာဝတီတိုင်း လပတ္တာမြို့နယ်မှာ နေထိုင်သူဖြစ်ပြီး ၎င်းတို့ တွေ့ရှိတဲ့သူတွေအနေနဲ့ မိသားစုရဲ့ ဖုန်းနံပါတ် 09-424 070 251 ကို ဆက်သွယ်ပေးဖို့ တောင်းဆိုထားပါတယ်။
မူဆယ်မြို့မှာ အလုပ်ရမယ်ဆိုပြီး လိမ်လည်ခံရတဲ့ဖြစ်စဉ်တွေ မကြာခဏ ဖြစ်ပွားနေတာကြောင့် အလွယ်တကူ မယုံကြဖို့ လူမှုကူညီရေးအသင်းတွေက တိုက်တွန်းထားကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
