ကျိုင်းတုံက အမျိုးသားတစ်ဦး ရိုက်နှက်နှိပ်စက်ခံရပြီး ဓားပြတိုက်ခံရ

ပပ၊ ဇွန်လ ၂၈ ရက်၊ ကျိုင်းတုံ

‎ရှမ်းအရှေ့ ကျိုင်းတုံမြို့နယ်မှာ လူငယ်အမျိုးသားတစ်ဦး လမ်းသွားနေချိန် ရိုက်နှက်နှိပ်စက်ခံရပြီး ဓားပြတိုက်ခံရကြောင်း ကျိုင်းတုံရှိ အမျိုးသားတစ်ဦးရဲ့ ပြောပြချက်အရ သိရပါတယ်။

‎ပြီးခဲ့တဲ့ ဇွန်လ ၂၅ ရက် ည ၁၀ နာရီဝန်းကျင်မှာ ကျိုင်းတုံမြို့နယ် ကျိုင်းကာရွာမှာ အသက် ၂၀ ကျော်အရွယ် အမျိုးသားတစ်ဦး စီးလာတဲ့ ဆိုင်ကယ်အပြင် ဖုန်းကို အမျိုးသား ၄ ဦးက လုယက်ကာ ရိုက်နှက်ခဲ့တာပဲ ဖြစ်ပါတယ်။

‎ကျိုင်းတုံမြို့ခံ အမျိုးသားက “အရင်ကဆိုရင် မြို့ပေါ်မှာပဲ ဖြစ်လေ့ဖြစ်ထရှိတာ။ အခုက ရွာဘက်တွေအထိ ကူးလာပြီ။ အဓိက ဒီမြို့မှာ လောင်းကစားမျိုးစုံတွေ ရှိနေလို့ လူတွေ ပျက်စီးလာကြတာ” လို့ ပြောပါတယ်။

‎ရိုက်နှက်ခံရသူ အမျိုးသားဟာ ခြေထောက်၊ ဦးခေါင်းနဲ့ ကျောပြင် စတဲ့နေရာတွေမှာ ဒဏ်ရာ ရခဲ့တာကြောင့် ကျိုင်းတုံ ပြည်သူ့ဆေးရုံမှာ ဆေးကုသမှု ခံနေရကြောင်း အထက်ပါအမျိုးသားက ပြောဆိုပါတယ်။

‎ဒါ့အပြင် သက်ဆိုင်ရာကို အမှုဖွင့်တိုင်ကြားထားပေမဲ့ မနေ့ ဇွန်လ ၂၇ ရက်အထိ ဓားပြတိုက်သူတွေကို ဖမ်းဆီးနိုင်တာ မရှိသေးကြောင်း ၎င်းက ဆက်ပြောပါတယ်။

‎အလားတူ ပြီးခဲ့တဲ့ မေလ ၁၃ ရက်ကလည်း ကျိုင်းတုံမြို့က ရွှေဆိုင်ပိုင်ရှင် ဓားပြတိုက် သတ်ဖြတ်ခံရပေမဲ့ တရားခံတွေကို တာဝန်ရှိသူက ဖမ်းဆီးအရေးယူနိုင်တာ မရှိသေးကြောင်း ဒေသခံတွေက ပြောဆိုပါတယ်။

~ ~ ~

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram