ယာရူစိင်၊ မတ်လ ၁၇ ရက်၊ ပန်ဆန်း
“ဝ”တပ်မတော်- UWSA ထိန်းချုပ်ထားတဲ့ ပန်ဆန်းမြို့မှာ ဓားခုတ်မှု ဖြစ်ပွားခဲ့ပြီး အမျိုးသား ၁ ဦး ပြင်းထန်ဒဏ်ရာ ရရှိခဲ့တယ်လို့ ဖြစ်စဉ်သိရှိသူ အမျိုးသမီးတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မတ်လ ၁၅ ရက် နေ့လယ်ပိုင်းမှာ တရုတ်အမျိုးသား ၂ ဦး စကားများကြရာကနေ ဓားခုတ်မှု ဖြစ်ပွားခဲ့တာဖြစ်ပြီး ဓားခုတ်ခံရမှုကြောင့် တရုတ်အမျိုးသား ၁ ဦးက ခန္ဓာကိုယ်နဲ့ လက်တစ်ဖက်မှာ ဒဏ်ရာ ရသွားတယ်လို့ ဆိုပါတယ်။
အဆိုပါ အမျိုးသမီးက “ပိုက်ဆံ ချေးတဲ့ကိစ္စ ပိုက်ဆံ ပြန်မပေးတာမျိုး ဖြစ်မယ်။ သူ့လက်ထဲမှာက ဓားကိုင်ထားတော့ သူတို့ သူ့ကိုဖမ်းတဲ့အချိန်မှာ သေနတ်ဖောက်ပြီးမှ ဖမ်းရတာ။ ဒီမှာကျ အဓိကတော့ ဒီလောင်းကစားတွေ မူးယစ်ဆေးဝါးတွေ ဖဲရှုံးတာ ဖြစ်လာပြီဆိုရင် ခိုးမှုတွေ ဓားပြမှုတွေ ကြံလို့မရရင် လူသတ်မှုအထိပါ ဖြစ်တာပေါ့” ဆိုပြီး ပြောပါတယ်။
ဓားခုတ်သူ အမျိုးသားကိုတော့ “ဝ”တပ်ရဲ့ ရဲတပ်ဖွဲ့က ဖြစ်စဉ်ဖြစ်ပွားတဲ့နေ့မှာပဲ ဖမ်းဆီးရမိခဲ့ပြီး “ဝ”ပြည်ရဲ့ တရားဥပဒေအတိုင်း အရေးယူသွားမယ်လို့လည်း သိရပါတယ်။
ပန်ဆန်းမြို့မှာ ပြီးခဲ့တဲ့ ဖေဖော်ဝါရီ ၂၀ ရက်ကလည်း တက္ကစီ အတူစီးကြတဲ့ တရုတ်နိုင်ငံသား ၂ ဦး စကားများကြရာကနေ အချင်းချင်း ဓားနဲ့ ထိုးခဲ့တဲ့ဖြစ်စဉ် ဖြစ်ပွားခဲ့ဖူးပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
