ရဲမာန်၊ ဧပြီ ၅ ရက်၊ မြင်းခြံ
မန္တလေးတိုင်း မြင်းခြံမြို့နယ် ဖက်ပင်အိုင်ကျေးရွာက အရပ်သား ၂ ဦးကို စစ်ကောင်စီတပ် ပစ်သတ်သွားတဲ့အပြင် ဒရုန်းဗုံးနဲ့ပါ ကြဲချတိုက်ခိုက်ခဲ့လို့ စုစုပေါင်း အရပ်သား ၈ ဦး သေဆုံးခဲ့တယ်လို့ မြင်းခြံလူထု လှုပ်ရှားမှုကော်မတီက ထုတ်ပြန်ထားပါတယ်။
ပြီးခဲ့တဲ့ ဧပြီ ၂ ရက် မနက် ၇ နာရီမှာ ဆုံရွာကနေ ဖက်ပင်အိုင်ရွာဘက် အင်အား ၁၀၀ ပါ စစ်ကြောင်းနဲ့ သေနတ် ပစ်ဖောက်ကာ ဝင်ရောက်လာခဲ့ပြီး အရပ်သားတွေကို ဘုန်းကြီးကျောင်းမှာ စုခိုင်းစေခဲ့တယ်လို့ မြင်းခြံလူထု လှုပ်ရှားမှုကော်မတီမှ တာဝန်ရှိသူတစ်ဦးက ရွှေဖီမြေကို ပြောပါတယ်။
“ပျူနဲ စစ်ကောင်စီတပ်သားတွေက ဘုန်းကြီးကျောင်းထဲဝင်ပြီး ဘုန်းကြီးကို ရွာသားတွေကို ဘုန်းကြီးကျောင်းထဲ စုခိုင်းတာ။ တချို့က ရွာအပြင်သစ်ပင်တွေအောက်မှာ ပုန်းတဲ့သူက ပုန်း၊ ဘုန်းကြီးကျောင်းထဲ စုရတဲ့သူက စု။ ဘုန်းကြီးကျောင်းထဲက ပျူက ရွာအပြင် ထွက်ချင်ထွက်လို့ရပြီပြောတယ်။ ရွာထဲ ရောက်နေတဲ့ ပျူက လိုက်ပစ်ကြတာ။ အမျိုးသားတစ်ဦးက ဆိုင်ကယ်နဲ့ ရွာအပြင် ထွက်ချိန် လိုက်အပစ်ခံရတာ။ ရွာအထွက်နဲ့ ကားလမ်းဘေး ရွာဆိုင်းဘုတ်ကြားမှာ ပစ်သတ်ခံရတာ။ နောက်တစ်ဦးကတော့ အမျိုးသမီးပါ။ ကားလမ်းလေး ရွာဆိုင်းဘုတ်နား ပစ်သတ်ခံရတာ”
အဆိုပါ အရပ်သား ၂ ဦးကို ပစ်သတ်ခဲ့ပြီးနောက် ဒရုန်းဗုံး ၃၀ နဲ့ ထပ်မံ ကြဲချတိုက်ခိုက်တာကြောင့် အမျိုးသား ၃ ဦးနဲ့ အမျိုးသမီး ၃ ဦး ထပ်မံ သေဆုံးခဲ့တယ်လို့ ၎င်းက ဆက်ပြောပါတယ်။
“ဒရုန်းဗုံး ထိလို့ သေဆုံးတဲ့လူထဲက ၂ ဦးက သားအမိတွေပါ။ မိခင် ဒရုန်းဗုံး ထိလို့ သားက အလောင်း သွားသယ်ချိန် ဒရုန်းနဲ့ ဗုံး ထပ်ချခံရတာပါ”
ဖက်ပင်အိုင်ရွာက အရပ်သား ၈ ဦး သေဆုံးခဲ့တဲ့အပြင် ဖက်ပင်အိုင်ရွာရှိ အိမ်ခြေ ၃၅၀ ထဲက အိမ်ခြေ ၃၀၀ ကိုလည်း မီးရှို့ဖျက်ဆီးခဲ့တယ်လို့ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
