ဝတ်မှုံ၊ မေလ ၁၆ ရက်၊ ကွတ်ခိုင်
ကိုးကန့်တပ်- MNDAA ပြန်ထိန်းချုပ်ထားတဲ့ ကွတ်ခိုင်မြို့နယ်က ကျေးရွာတွေမှာ စာသင်ကျောင်း ဖွင့်ချင်ရင် ကိုးကန့်တပ်ထံ စာတင်ရမှာဖြစ်ပြီး ကျောင်းသူကျောင်းသားဦးရေ ၅၀ အထက်ရှိမှ ကိုးကန့်တပ်ဘက်က ကျောင်းဖွင့်ပေးမယ်လို့ ဒေသခံတွေက ပြောပါတယ်။
ဒေသခံတွေအနေနဲ့ ကျောင်းဖွင့်ချင်ရင် ရွာမှာ ရှိထားတဲ့ ကျောင်းဆရာဆရာမဦးရေနဲ့ ကျောင်းသူ ကျောင်းသားဦးရေစာရင်းကို MNDAA ထံ တင်ပြတောင်းဆိုရမှာဖြစ်တယ်လို့ ဒေသခံ အမျိုးသမီးတစ်ဦးက ပြောပါတယ်။
“ဆရာဆရာမ ရှိထားရင်လည်း ဘယ်နှစ်ယောက်လဲပေါ့။ လုံလောက်လား မလုံလောက်လား သိရအောင်လို့တဲ့။ ကျောင်းသားဦးရေ ၅၀ အထက် မရှိရင်တော့ ဖွင့်မပေးဘူးတဲ့။ ကျောင်းသားဦးရေ ၅၀ မပြည့်ရင်တော့ စာတင်လည်း သူတို့မပေးဘူး”
ကိုးကန့်တပ်ဘက်က သတ်မှတ်ထားတဲ့ ကျောင်းသားဦးရေ မပြည့်တဲ့ ကျေးရွာတွေအနေနဲ့ ရွာခံတွေဘက်က ကိုယ်ထူကိုယ်ထ ဆရာဆရာမ ငှားပြီး ကျောင်းဖွင့်နိုင်တယ်လို့ ဒေသခံ အမျိုးသားတစ်ဦးက ပြောပါတယ်။
“ဒီမှာက သူတို့ သတ်မှတ်ထားတဲ့ ကျောင်းသူကျောင်းသားဦးရေ မပြည့်တော့ ကိုယ်ထူကိုယ်ထပဲ ဖွင့်ရမှာ။ ကျောင်းကတော့ ဖွင့်ခိုင်းပါတယ်။ ဆရာဆရာမတော့ မပေးဘူးပေါ့။ TLEC ရှိတုန်းကတော့ သူတို့အကုန်ဖွင့်ပေးတယ်။ ဒီမှာလည်း သူတို့ပဲ ဖွင့်ပေးထားတာလေ”
ကွတ်ခိုင်မြို့နယ်ထဲ ကျောင်းသားဦးရေ ၅၀ မပြည့်တဲ့ ကျေးရွာအများစု ရှိနေပြီး တအာင်းတပ် ထိန်းချုပ်စဉ်က အဲဒီကျေးရွာတွေမှာ တအာင်းပြည်ပညာရေးကောင်စီ- TLEC က ကျောင်း ဖွင့်လှစ်ခဲ့ပေမဲ့ အခုတော့ ပိတ်ခံရတော့မယ့်အခြေအနေနဲ့ ကြုံတွေ့နေရပါတယ်။
အခုလို ကျောင်းပြန်ဖွင့်ဖို့ မသေချာ မရေရာမှုတွေကြောင့် ကျောင်းသားမိဘတချို့က ၎င်းတို့ရဲ့ ကလေးတွေ ကျောင်းဆက်တက်နိုင်ဖို့ ရန်ကုန်နဲ့ မန္တလေးက ပရဟိတကျောင်းတွေမှာ သွားပို့တာတွေ ရှိလာတယ်လို့ အထက်ပါ အမျိုးသားက ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
